ဂျာမူး ဂျာမူး

အင်ဒိုနီးရှား ကိုတာဝန် အသစ်နဲ့ မပြောင်း ခင်မှာ လုပ်ငန်းနဲ့ ပတ်သက်တဲ့ သင်တန်း တက်ဖို့ အရင်ရောက်ခဲ့ရပါတယ်။ ဘာလီက ဒန်ပါဆာလေဆိပ်ကို ပထမဦးဆုံး ခြေချ မိတဲ့ အခါမှာ ကတည်းက ဘာလီ နဲ့  ဘာလီကျွန်းသူကျွန်းသား တွေဟာ ကိုယ်နဲ့ မစိမ်း သလိုလို၊ အရင်တုန်းက ပဲ ရောက်ခဲ့ ဖူးသလိုလို ခံစားမှု မျိုး ဖြစ်ပေါ်လာပါတယ်။ ဘာလီကျွန်း ရဲ့ နာမည်ကျော် ဂျင်ဘာရမ် ကမ်းခြေက ဟိုတယ် (Seri Segara Hotel သီရိသမုဒ္ဒရာ ဟိုတယ်လို့ ဘာသာပြန်ရမယ်) မှာ ရက်သတ္တပါတ် နှစ်ပါတ်လောက် နေပြီး ရုံးကို အကြိုအပို့ လုပ်တဲ့ ကားနဲ့ မနက် ရှစ်နာရီခွဲ လောက် သွား၊ ပြီးရင် ညနေ ငါးနာရီကျော် ကျော်လောက်မှာ ဟိုတယ်ကို ပြန်ပို့ ဆိုတဲ့ အစီအစဉ်ဘောင်ထဲမှာပဲ နေသားကျနေခဲ့ရ ပါတယ်။  ဘာလီက လမ်းကျဉ်းကျဉ်းကလေးတွေ၊ လမ်းဆုံလမ်းခွ တွေ၊ အခိုင်အခန့် နတ်ကွန်းတွေ၊ လမ်းဘေး ဈေးဆိုင်ကလေးတွေ နဲ့ အသားညိုညို အပြုံးချိုချို ပိုင်ရှင် ဘာလီကျွန်းသူ တွေ ဟာ ကိုယ်နဲ့ ရင်းနှီးနေသလို မျိုး ခံစားရပါတယ်။ ဘာလီဟာ ကမ္ဘောဒီးယား က ဆီရမ်ရိ (Siem Reap) နဲ့ တူသလိုလို၊ မြန်မာပြည် မော်လမြိုင်က ရပ်ကွက် တခုထဲ ရောက်နေသလိုလိုဖြစ်နေမိပါတယ်။ ဆိုခဲ့တဲ့ အကြောင်းအရာတွကြောင့်ပဲ လား ခင်မင်နှစ်လိုဖွယ် ဘာလီ ကျွန်းသူ ကျွန်းသားတွေဟာ မြန်မာတွေနဲ့တူလွန်း လို့ပဲလား ဘာလီနဲ့ စိမ်းမနေပဲ သိပ်ရင်းနှီးသလိုဖြစ်နေတယ်လို့ခံစားမိပါတယ်။

ဘယ်လိုပဲ ဖြစ်ဖြစ် ကိုယ်နဲ့ မတူပဲ ထူးခြားတဲ့ အလေ့ အထ၊ ယဉ်ကျေးမှု အမူအကျင့် တွေကို တနင်္ဂနွေ နှစ်ပါတ် အတွင်း ရုံးသွား၊ ရုံးပြန် သတိထား လေ့လာကြည့်မိပါတယ်။ နားရွက်ကြားမှာ စကားဝါပန်းထိုးထားတတ်တဲ့ ခပ်ပျော်ပျော် လုပ်ဖော်ကိုင်ဖက် ဒရိုင်ဘာ ကတွတ် (Ketut) ပြီးရင် မနက်တိုင်း သတိထား မိတဲ့ အထဲမှာ ပုလင်းပေါင်းစုံကို တောင်းထဲထည့် ပြီး လည်ရောင်းနေတဲ့ ဈေးသည်တွေက ထိပ်ဆုံးက ပါပါတယ်။ တချို့ က ပုလင်းတွေထည့်ထားတဲ့ တောင်း ကို ပါတိတ်အစ နဲ့ ကျောပိုး သိုင်းပြီးလမ်းလျှောက် လည်ရောင်းကြ သလို၊ တချို့ က လည်း စက်ဘီး၊ တချို့ က ဆိုင်ကယ် အစရှိသဖြင့် ပုံစံ အမျိုးမျိုး နဲ့ ရောင်းတာတွေ့ ရပါတယ်။ အဲဒီ အသည် ဘာသည်လဲ ဆိုတာ တွေ့မိတိုင်း သိချင်စိတ် အလွန်ပြင်းပြင်းပြပြ ဖြစ်မိပေမယ့် ရုံးကိုရောက်တဲ့ အခါကျတော့ ရှုပ်ထွေးများပြားလှတဲ့ လုပ်ငန်းတာဝန်တွေ နဲ့ ဖိစီးပြီး လုပ်ဖော်ကိုင်ဖက်တွေကို မမေးမိပြန်ဘူး။ ဒီလို နဲ့ လုပ်ငန်းဆိုင်ရာ သင်တန်း နှစ်ပါတ်ပြီး လို့ ဘာလီက နေ မလေးရှား ကို ပြန်သာ လာခဲ့ရတယ် အဲဒီ အသည် ဘာသည် လဲ မသိလိုက်ရဘူး။

မလေးရှား ကနေ ဘာလီ ပြောင်းရတဲ့ အခါကျတော့လဲ ပြောင်းခါ စဆိုတော့ ရုံးတာဝန်၊ အိမ်ထောင်တာဝန် တွေကြောင့် အမှူ့ မဲ့ အမှတ်မဲ့ ပဲဖြစ်နေခဲ့ပါတယ်။ နောက်ပိုင်းမှာ အဲဒါကို ဂျာမူး ရောင်းသည့်အသည် ဆိုတာသိပေမယ့် တခါမှ အသေးစိပ်လေ့လာမကြည့်ရသေးပါဘူး။ ဒါပေမယ့် တညနေ ရုံးက အပြန် လမ်းမှာ လူတွေဝိုင်းနေတဲ့ အဲဒီအသည် တွေ့လို့ ကားရပ်ပြီး ၀င်အား ပေးပါတယ်။ ဘယ်လိုသောက်မလဲ လို့ဈေးသည်က မေးတော့ ဘယ်လိုမျိုးရလဲ ပြန်မေးလိုက်ပါတယ်။ သူပြန်ပြောတဲ့ အမျိုးပေါင်း များစွားကို နားသိပ်မလည်တော့ ရိုးရိုးပဲ  ပေး (Biasa saja)  လို့ ပြောလိုက်ပါတယ်။ အဲဒီမှာ သူက ပုလင်းပေါင်းစုံထဲ က အရည်ပေါင်းစုံ၊ အမှုံ့ ပေါင်းစုံ နည်းနည်း ချင်းထည့်ပြီး ဘဲဥ ထည့်မလား ထပ်မေးပါတယ်။ ကိုယ်စကား ပြန်မရခင်ပဲ ဘဲဥတလုံးကို ခွဲ ပြီး အကာတွေကို သွန်ပါတယ်။ အနှစ်ချည်းသီးသန့် ကိုစောစော က ခွက်ထဲ ကိုထည့် ပြီး မွှေပါတော့တယ်။ နှံ့လောက်ပြီ ထင်မှ ဖန်ခွက် အသစ်တစ်လုံးထဲ ကိုစောစောက ညိုပြစ်ပြစ် အရည်တွေထည့် ပြီး ကမ်းပေးပါတယ်။ ကျနော်လဲ မှာပြီးမှ တော့ မထူးပါဘူး ဆိုပြီး တကျိုက်တည်း မော့ ချလိုက်ပါတယ်။

ငရုတ်သီး ၊ ဆနွင်းမှုန့်၊ မဆလာတွေ ရောပြီး မွှေချက် ချက် ရင်တောင် ညီစို့စို့ နံတတ်တဲ့ ဘဲဥ အနှစ်ပါပေသော်လည်း လုံးဝ မညှီပဲ အရသာဟာ ချိုသလိုလို၊ ငန်သလိုလို၊ ခါးသလိုလို နဲ့ ပူရှိန်းရှိန်း ဖြစ်ပြီး တော့ လည်ချောင်းထဲ ကို နွေးခနဲ စီးဝင်သွားပါတယ်။ အိမ်ပြန်ရောက်တော့ လဲ လူက ပူရှိန်းရှိန်းဖြစ်နေပြီး ရေတ၀ ချိုးလိုက်ခါမှပဲ လန်းဆန်းပြီး ဗိုက်ပါ ဆာသွားပါတော့တယ်။ နောက်တော့ အိမ်နီးချင်း ဒေါက်တာမ လာလည် တုန်း အသေးစိပ် မေးတဲ့အခါကျမှ ဂျာမူးအကြောင်း တော်တော်များများ သိရပါတော့တယ်။ 

တကယ်တော့ ဂျာမူး ဆိုတာ အင်ဒိုနီးရှား နိုင်ငံ ဂျာဗား ကျွန်းမကြီး အနှံ့ က ကျွန်းသူ ကျွန်းသားတွေ နေ့စဉ် မှီဝဲ တဲ့ တိုင်းရင်းဆေး တစ်မျိုးပါပဲ။ ဆေးဖက်ဝင် အပင်ပေါင်းစုံ က အရွက်၊ အသီး၊ အရိုး၊ အမြစ်၊ အပွင့်၊ အခေါက် တွေကို ဆေးဖော်စပ်ပြီး သောက်သုံးကြ တာဖြစ်ပါတယ်။ ဂျာမူးကို ရှေးနှစ်ပေါင်းများစွာ ကတည်း က သုံးစွဲ လာလိုက်တာ ဆင်းရဲ ချမ်းသာ မရွေး၊ မြို့ပြ ကျေးလက် မခွဲ ခြားပဲ လူတန်းစားပေါင်းစုံ ရဲ့ မှီဝဲ အားထား ရာ တစ်ခု အဖြစ်ယခု အချိန်အထိ အင်ဒိုနီးရှား ကျယ်ကျယ်ပြန့် ပြန့် အားကိုးတကြီး မှီဝဲ့ အသုံး ပြုတာ ဖြစ်ပါတယ်။

ဂျာမူး ရှင်

ဂျာမူး မှာ ပါဝင်တဲ့ ဆေးဖက်ဝင် သစ်ရွက်၊ သစ်ခေါက်၊ သစ်မြစ်၊ သစ်ဖု၊ သစ်သီး၊ သစ်ဖူး ၊ သစ်ပွင့်

ဂျင်းပင်

ဂျာမူး ပြုလုပ်ပုံ ကို ရှာဖွေ လေ့လာပြီး ရေးရရင် တိုင်းရင်းဆေးကျမ်း ပုံစံ မျိုး ဖြစ်သွား နိုင်တဲ့ အတွက် ဂျာမူး ဖော်မြူလာတော့ ရေးဖို့ အစီအစဉ် မရှိပါ။သို့ ပေမယ့် အကြမ်းအားဖြင့် ဂျာမူး တဖုံ မှာ အခြေခံ ပါဝင်တဲ့ ပရဆေးပင် တွေ ရာပေါင်း များစွာ မှ အနည်းငယ်ကို စုစည်း ကြည့်တဲ့ အခါမှာ အောက်ပါအပင်တွေ အဓိကပါဝင်တာတွေ့ ရပါတယ်။ 

ဂျင်း (ချင်း) Ginger (Zingiber Officinale)
ဂျင်း တမျိုး Lempuyang (Zingiber Oronaticum)
ဂျင်း တမျိုး Temu Lawak/ Wild Ginger (Curcuma Cautkeridza) (ဘာလီကျွန်းသား တွေ ငှက်ပျောအူ၊ ကြက်သားနဲ့ ရောချက်ပြီး အထင်ကရ ပွဲတွေမှာ ကျွေးလေ့ရှိသည်။) 
နနွင်းတက် Kunyit/ Tumeric (Curcuma Domestica)
ဂျင်းတမျိုး Kencur/ Greater Galingale (Kaemferi Galanga)
ဂျင်းတမျိုး Lengkuas/ Ginger Plant (Elpina Galanga)
ဂျင်းတမျိုး Bengle (Zingiber Bevifalium)

(မှတ်ချက် အနေနဲ့ ၀န်ခံရရင် အဲဒီ သစ်ဥ သစ်ဖုတွေ အားလုံး ဟာ ဂျင်းတက် နဲ့ ဆင်တူယိုးမှား တွေချည်းပါပဲ။ တိုင်းရင်းဆေးပညာ နဲ့ ရုက္ခဗေဒမှာ နကန်း တလုံးမှ မတတ်တော့ ခပ်တည်တည် နဲ့ (ဂျင်းတမျိုး) ဆိုပြီး ရောချ လိုက်ပါတယ်။ စကားမစပ် ငယ်ငယ်တုန်း က အကြောင်းလေး သွားသတိရပါတယ်။ အမေက ဈေးမှာ ဂျင်း တက် နည်းနည်း သွားဝယ်ခိုင်းပါတယ်။ ဂျင်းတက် လို့ ဘာလို့ ခွဲပြောရသလဲ ဆိုတော့ ကျနော် တို့ နယ်မှာ ဂျင်းကို ပေါက်ပြီး တမျိုး၊ ပိုးတီး ပုံ တမျိုး လုပ်ရောင်းလို့ ပဲဖြစ်ပါတယ်။ ဆက်ရရင် ကျနော် ဈေး ကိုရောက်တော့ ဂျင်းတက် ရောင်းတဲ့ အသည် ကိုရှာမတွေ့ ပါဘူး။ အဲဒီမှာ အမှုန့် ရောင်စုံတွေ ကို သံဖြူနဲ့ လုပ်ထားတဲ့ မှန်ပုံး တွေ နဲ့ ထည့် ရောင်းတဲ့ ဆိုင် မှာ ဂျင်းတွေ ကို သံပုံး တခုနဲ့ သပ်သပ်ယပ်ယပ် ထည့်ထား တာကို သွားတွေ့ ပါတယ်။ ကျနော် က ဆိုင်ရှင် အဒေါ်ကြီး ကို ဂျင်း နှစ်ကျပ် ဖိုးလောက် ရောင်းပါ လို့ ပြောတော့ အဲဒီ အဒေါ်ကြီး က အဲဒါ မိတ်သလင်.. ကွဲ့ တဲ့ :P )


အရွက်
ငုပင် (ဟုထင်သည်) Secang (Caesalpinia Sappan)
ပိန်းရွက် တမျိုး Sambang Dara (Rexco Ecaria Bicolar Hassk)
ကွမ်းရွက် Brotowali (Tiospora Rumpii Boerl)
ဂျာဗားကျွန်း အနှံ့ ပေါက်တတ်သည့် အပင်တမျိုး Adas (Foeniculum Vulgare Mill)

အသီး
သံပရို / သံပုရာသီး Jeruk Nipis/ Calamondin (Citrae Aurantifalia Sivingle)
ခရမ်းကစော့ သီးတမျိုး (ဟုထင်သည်) Ceplukan (Physalic Angulata Him)
ပုန်းညှက် သီး (ဟုထင်သည်) Nyamplung (Calophylum Inaphyllu)

အခေါက်

သစ်ဂျပိုး Kayu Manis/ Cinamon (Gijeyzahyza Glabra)

အပွင့်
စပါယ် Melati/ Yasmin / Jasmine (Jataninum Sunbac Ait)
သမန်းမြက်ပွင့် (ဟုထင်သည်) Rumput Alang-alang (Gramineae)

တကယ်တန်း ဂျာမူး အကြောင်းလေ့လာရသည်မှာ မလွယ်ကူပါ။ အထူးသဖြင့် ကျနော့်လို ဂျင်းနဲ့ မိတ်သလင် ကိုပင် မခွဲတတ်သော သူများ အတွက် သာ၍ မလွယ်ပါသေးသည်။ ဂျာမူးကို အင်ဒိုနီးရှား မှာ ဘာလို့ ကျယ်ကျယ်ပြန့်ပြန့် မှီဝဲ သုံးစွဲ ကြသလဲ ဆိုတော့ -

၁) နေရာတကာ မှာ အလွယ်တကူရ နိုင်ခြင်း
၂) ဈေးနှုံး ချိုသာ ခြင်း
၃) ဘေးထွက် ဆိုးကျိုး မရှိ ခြင်း တို့ ကြောင့်လို့ ဆိုပါတယ်။

ဂျဗားသူ၊ ဘာလီ သူတွေ ချောတာ၊ ကျန်းမာ တာဟာ ဂျာမူး ဆိုတဲ့ လျှို့ ၀ှက်ချက်ကြောင့် လို့ ဆိုကြပါတယ်။ ဂျာမူး အကြောင်း ဆက်စပ်သမျှ ပြောရရင် ကုန်နိုင်ဘွယ် မမြင်ပါဘူး။ အင်ဒိုနီးရှား ရုပ်ရှင်ဇာတ်လမ်း တွဲတွေ ထဲမှာလဲ ဇာတ်ဆောင်မင်းသမီး တွေဟာ ဂျာမူးရောင်းတဲ့ ဂျာဗား က ဂျာမူးသည် အဖြစ် သရုပ်ဆောင်တာ ခဏခဏ ပါတတ်ပါတယ်။ သမီး အငယ်လေးရေ၀တီ မွေးခါစ မှာ ခင့် ကို မီးထွက် စမိခင်တွေသောက်ရတဲ့ ဂျာမူး ၀ယ်တိုက်ရပါတယ်။ မွေးကင်းစ ရေ၀တီကလေး ကိုလဲ ထက်လင်းရင်လူးဆေး မရနိုင်တဲ့ ဘာလီမှာ ဂျာမူး ရင်လူးဆေး Minyak Telon  ကိုပဲအားထား ရပါတယ်။ ဂျာမူး ဟာ ဘယ်လောက်အထိ လွှမ်းမိုးနိုင် သလဲ ဆိုရင် သမီးအကြီးမလေး ဘာလီသူ သူငယ်ချင်းတွေ နဲ့ ကစား တဲ့ အခါမှာ ကစားစရာ ခွက်တွေ၊ ဘူးတွေကို ခြင်းတခုထဲ ထည့်ပြီး "ဂျာမူး..ဂျာမူး" လို့ အော်ပြီး ဂျာမူး သည်လုပ်တန်း ကစားသည် အထိပါပဲ။ 

အင်ဒိုနီးရှား ကနေ မလေးရှားကို ပြန်ပြောင်း လာခဲ့ရပါပြီ။ ဒါပေမယ့် တခါ တလေမှာ "ဂျာမူး......ဂျာမူး" ဆိုတဲ့ အသံ ကိုတော့ ကြားယောင်နေတုန်းပါပဲ။                ။


ဓါတ်ပုံ / Photo / Gambar
ဓါတ်ပုံအားလုံး အင်တာနက်မှ ကူးယူပါသည်။ 
Photos are taken from internet and credits are due to all respective photographers.
Saya menganbil dari internet dan facebook. Maaf dan terimakasih.


ကိုးကား / Reference / Referensi
အချက်အလက်အများစု ကို အင်ဒိုနီးရှားဝက်ဆိုက်များမှ ရယူပါသည်။
Many facts about Jamu are taken from some Indonesian webpages.
Saya manganbil informasi dangan referensi dari Indonesia webpages. 

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ဂျာကာတာ ခဏလေးများ

ပျော်ပျော်ရွှင်ရွှင် ရှော့ပင်ထွက်လို့ကောင်းတဲ့နေရာ၊ အင်ဒိုနီးရှားရဲ့ အကောင်းဆုံး အစားအသောက် တွေရ နိုင်တဲ့ မြို့၊ ယဉ်ကျေးမှု့အမွေအနှစ် တွေနဲ့သမိုင်းဝင် အထိမ်းအမှတ်တွေ စုစည်းရာ ဌာန၊ ပူနွေးစိုစွတ် တဲ့ ပါတ်ဝန်းကျင် နဲ့ ကြပ်ညပ်နေတဲ့ လမ်းမ ကျယ်ကြီးတွေရဲ့ အချိန်ကြာမြင့်စွာ ပိတ်ဆို့ နေတာတွေကို စိတ်ရှည်သည်းခံ နိုင်မယ် ဆိုရင် အရှေ့တောင်အာရှရဲ့ အကြီးဆုံး ဂျာကာတာ မြို့ ကိုတစ်ခေါက်လောက်တော့ အနည်းဆုံး လည်သင့် တဲ့ နေရာ လို့ ဆိုချင်ပါတယ်။ အင်ဒိုနီးရှား နိုင်ငံ ဘာလီကျွန်း မှာအလုပ်တာဝန် နဲ့ နေထိုင်စဉ် အတွင်း ဂျာကာတာ ကို အလုပ်ကိစ္စ အကြောင်းအမျိုးမျိုး နဲ့ ရောက်ဖြစ်ခဲ့ပါတယ်။ ရောက်တဲ့ အခေါက်တိုင်း ၂၄ နာရီထက် ပိုပြီး မနေဖြစ်ခဲ့ပေမယ့် အရှိန်အဟုန် နဲ့ ဖွင့်ဖြိုးတိုးတက် နေတဲ့ ဂျာကာတာ ကို တွေ့ကြုံ ခံစား ဖြစ်ခဲ့ပါတယ်။


လူဦးရေ ဆယ့်သုံးသန်း ကျော် မှီတင်း နေထိုင်ရာ အင်ဒိုနီးရှားရဲ့ မြို့တော် ဂျာကာတာ ဟာ သန်းပေါင်းများစွာသော ဆိုင်ကယ် တွေ၊ ကားတွေနဲ့ အမြဲ ရှုပ်ထွေး ပြည့်ကြပ်နေပြီး နေ့စဉ် နှင့် အမျှ လဲ ကျွန်းပေါင်း သောင်း သုံးထောင်ကျော်က ဒေသတွင်း ခရီးသွား တွေ စီးဝင် စီးထွက် နေရာ မြို့တော်ကြီးပဲ ဖြစ်ပါတယ်။ ဂျာကာတာ ကို မဖြစ်မနေ သွားရမယ့် ကိစ္စ တွေရှိလာတော့ ပထမ ဘာလီကျွန်းကနေ ဂီလီထရမ်ဝမ်ဂန် ဆိပ်ကမ်းကို ကိုယ့်ဖာသာ မောင်းသွား ပြီး အဲဒီကနေ မှ တဆင့် ဂီလီမာနောက် (Gilimanauk) ကို မော်တော်ကား တွေ ကွန်တိန်နာ တွေတင်တဲ့ ဇက်သင်္ဘောနဲ့ ဂျာဗားကျွန်း မကြီး ကိုရောက်၊ အဲဒီနောက် ဆူရာဗာရ (Surabaya) ကနေ တဆင့် ဆင်မာရမ် မြို့ (Semarang) မြို့ကို ဖြတ်ပြီး မြို့တော် ဂျာကာတာ အထိခရီးရှည် နှစ်ရက်ခန့် မောင်းပြီး နောက်တစ်နေ့ မှာ ဂျာကာတာ မှာလုပ်စရာ ကိစ္စ မှန်သမျှ လုပ်ပြီး အပြန်ကို တခြားဘက်က ပတ်ပြီး နာမည်ကျော် ဘန်ဒေါင်း (Bandung) နဲ့ ဂျိုဂျကာတာ (Yogyakarta) ကိုဖြတ်ပြီး ဂီလီမာနောက် ကနေမှ တဆင့် ဘာလီကို အပြန်ဖယ်ရီ ပေါ်ကို မောင်းတင်ပြီး အေးအေးဆေးဆေး ပြန်မယ် ဆိုပြီး ကြံစည် ထားခဲ့ ပါတယ်။

ရုံးက အော်ပရေးရှင်း မန်နေဂျာ ကာဒက် (Kadet) ကို လမ်းကြောင်း သေချာမေး၊ မြေပုံ နဲ့ သေချာ တိုက်ပြီး အလုပ်ကပေးထားတဲ့ တိုရိုတာ ဖိုးဝှီး ကို တောင့်တင်းအောင်ပြင်ဆင်ပေးဖို့ အကူအညီတောင်းထားခဲ့ပါတယ်။ သို့ပေမင့် တကယ်တမ်း သွားဖြစ်ခဲ့တဲ့ အခေါက်တိုင်းမှာတော့ Lion Air နဲ့ လေကြောင်းကချည်းသာ သွား ခဲ့ရပါတယ်။ မနက်စောစော သုံးနာရီလောက်ထ၊ ဒန်ပါဆာ (Denpasar) လေဆိပ်မှာ ကားရပ်ခဲ့ ပြီး အစောဆုံး လေယာဉ်နဲ့ ဂျာကာတာကို သွား၊ တနေကုန် လုပ်စရာ ရှိတာလုပ်၊ နောက်အကျဆုံး ဆယ့်တစ်နာရီလေယာဉ်နဲ့ ၊ ဘာလီကို ပြန်လာ၊ နောက်တနေ့မနက် နှစ်နာရီလောက် ပြန်ရောက်၊ မနက်ရုံး မှီအောင် တက်၊ အဲလိုချည်းသာ အခြေအနေအရ အလျဉ်မှီ စီစဉ် သွားလာခဲ့ရပါတယ်။ နှစ်နာရီကျော် စီးရတဲ့ လေယာဉ်ပေါ်က ဆင်းတာနဲ့ လေဆိပ်က မှီရာ ဘတ်စကားနဲ့ အလုပ်ကိစ္စတွေရှိရာ ဂျာကာတာမြို့လည်ခေါင် (Pusat Jakarta - Jakarta City Center) ကို (ကားမပိတ်ရင် တစ်နာရီခန့်၊ ကားကြပ်ရင် မခန့်မှန်းနိုင်) စိတ်ရှည်သည်းခံ ပြီး ရောက်အောင် သွားရပါတယ်။ ပထမ အခေါက်တွေက အမြန်ရောက်ချင်ဇောနဲ့ တက္ကစီ စီးခဲ့ ပေမယ့် ဘတ်စကား နဲ့ ရောက်ချိန် သိပ်မကွာဘူး ဆိုတာ နောက်ပိုင်းမှာ သိလာခဲ့ရလို့ ဘတ်စကားပဲ စီးပါတော့တယ်။ အမျိုးသားကျောက်တိုင်ရှိရာ မြို့လည်က ပြည်သူ့ ရင်ပြင် (Merdeka Square) ၀န်းနားက ဘတ်စ်စတေရှင် ကနေ သုံးဘီး ဆိုင်ကယ် ဒါမှ မဟုတ် ဆိုင်ကယ် တက္ကစီနဲ့ အလုပ်ကိစ္စရှိတဲ့ နေရာ ကို ခရီးဆက်ရပါတယ်။


ဂျာကာတာ ဟာ ဖွံ့ဖြိုးတက်မှု့ နဲ့ စီးပွားရေးရာ တောင့်တင်းမှု့ကို အဆင့်မြင့် ရှော့ပင်းစင်တာကြီးတွေနဲ့ တင် ဂုဏ်ယူဝင့်ကြွားစွာ သက်သေပြနိုင်ပါတယ်။ ဒေသခံ အင်ဒိုနီးရှန်း တွေရဲ့ ၀ယ်ယူနိုင်စွမ်း (purchasing power) ကို သိသာထင်ရှားစေပြီး ဈေးနှုန်းနဲ့ ရွေးချယ် စရာ ပေါများ မှု့ တွေက တော့ ဒေသတွင်းက စင်္ကာပူ၊ ကွာလာလမ်ပူ နဲ့ ဟောင် ကောင် တို့ ကိုယှဉ်နိုင်တယ် လို့ ဆိုပါတယ်။ ပလာဇာအင်ဒိုနီးရှား (Plaza Indonesia) ဟာ ပထမဆုံး ရောက်ခဲ့ တဲ့ နေရာဖြစ်ပြီး ဂျာကာတာ ရှော့ပင်းစင်တာတွေထဲ မှာ ဥပမာ ပြစရာ ပုံသက်သေကောင်းပဲ ဖြစ်ပါလိမ့်မယ်။ အင်ဒိုနီးရှားရဲ့ အကောင်းဆုံး ရှော့ပင်းစင်တာတွေထဲ ကတစ်ခုဖြစ်ပြီး (Gucci, Georgio Armania, Bvlgaria) စတဲ့ နာမည်ကြီး (luxury brands) တွေ အပြင် ကမ္ဘာကျော် အင်ဒိုနီးရှား ပါတိတ်တွေ ကိုလဲ ခေတ်မှီ ဖက်ရှင်ဒီဇိုင်း အမျိုးမျိုး နဲ့ တီထွင် ဆန်းသစ်ထားတဲ့ ဆိုင်တွေလဲ များစွာ တွေ့ ရမှာ ဖြစ်ပါတယ်။ တစ်ယောက်တည်း သွားခဲ့ တဲ့ အခေါက်တွေမှာ ရှော့ပင်းစင်တာ တွေ ကို စိတ်မ၀င်စားပေမယ့် မိသားစု နဲ့ ရောက်ခဲ့ တဲ့ အခါ မှာတော့ ခြေတို လာလို့ လော်ဘီ မှာ တစ်ယောက်တည်း ဖြစ်သလို ထိုင်စောင့် ခဲ့ရပါ တယ်။ ခြေတို သက်သာပေသော်ငြား စောင့်ရ မျှော်ရလွန်းလို့ လည်ပင်း တော့ နည်းနည်း ပိုရှည်လာလိမ့်မယ် တော့ထင်ပါတယ်။


ဂျာကာတာ မှာ အင်ဒိုနီးရှား ရဲ့ ရှေးဟောင်း အမွေ အနှစ်တွေ လေ့လာ ခံစား နိုင်မယ့် နေရာ မိုနာ့ စ် (Monas) ကိုမရောက်ခဲ့ဘူး ဆိုရင်တော့ ဂျာကာတာ ကိုရောက်ခဲ့ တယ်လို့ ပြောရမှာ တော်တော် ခက်ပါလိမ့်မယ်။ တကယ်တော့ မိုနာ့စ် ဆိုတာ အင်ဒိုနီးရှား ဆိုတာ ဖြစ်လာအောင် တိုက်ခိုက်ရယူလို့ အောင်မြင်မှု ရခဲ့ တဲ့ အထိမ်း အမှတ် ကျောက်တိုင်ကြီးပဲ ဖြစ်ပါတယ်။ မိုနာ့စ် ဆိုတာကလဲ ဘာဟာဆာ အင်ဒိုနီးရှား လို အတို ကောက် (Monumen Nasional - Mo Nas) ခေါ်တာ ပဲ ဖြစ်ပါတယ်။ လေးရာလေးဆယ့် သုံးပေ မြင့်တဲ့ မိုနာ့စ် ကို ၁၉၆၁ ခုနှစ်မှာ သမ္မတကြီး ဆူကာနို ရဲ့ ညွှန်ကြား ချက်နဲ့ ဆောက်ခဲ့တာ ဖြစ်ပြီး ၁၉၇၅ ခုနှစ်မှာ အများ ပြည်သူ လေ့လာကြည့်ရှု နိုင်ရန် ဖွင့်လှစ်ခဲ့တယ် လို့ ဆိုပါတယ်။ အတွင်းပိုင်းမှာ ဟိန္ဒူဧကရာဇ် မဂျပထစ် (Majapahit) ကစပြီး လွတ်လပ်သော အင်ဒိုနီးရှား နိုင်ငံ အဖြစ် ရင့်ကျူး နိုင်ခဲ့တဲ့ ၁၉၄၅ ခုနှစ်၊ သြဂုတ်လ ၂၇ ရက်နေ့ အထိ အင်ဒိုနီးရှား ရဲ့ ရုန်းကန် လှုပ်ရှား လာခဲ့ရတဲ့ နိုင်ငံရေး သမိုင်း ကို ပုံတူ သေသေး ကလေး တွေ နဲ့ ပြကွက် တစ်ခုခြင်း၊ တစ်ခန်း ခြင်း အသေးစိပ် ပြထားပြီး အင်္ဂလိပ်၊ ဘာဟာဆာ အင်ဒိုနီးရှား နှစ်ဘာသာ နဲ့ ရေး ထားတဲ့ ကြေးပြား လေးတွေ တစ်ခန်းခြင်း စီမှာ ကပ်ထားပါတယ်။

မိုနာ့စ် အပေါ်ကို မတက်မှီ အောက်ထပ် က အလင်းရောင် မှိန်မှိန်နဲ့ ခန်းမကျယ်ကြီး က ပြခန်း ပြကွက်တွေကို တစ်ခုခြင်း၊ တစ်ခန်းခြင်း အသေးစိပ် ဖတ်နေမယ် ဆိုရင် တစ်နေကုန် လောက် ကြာ နိုင်မယ် ထင်ပါတယ်။ ပြတိုက် တို့ ရဲ့ ထုံးစံ အတိုင်း အလယ်တန်း၊ အထက်တန်း ကျောင်းသူ ကျောင်းသား အုပ်စုတွေနဲ့ ပြည့်နေပြီး ဒေသတွင်း ခရီးသွား တွေလဲ တဖွဲဖွဲ လာလေ့လာ ကြည့်ရှု့ နေကြတာ တွေ့ရပါတယ်။ မိုနာ့စ် ရဲ့ အပေါ်ထပ် (Observation Deck) မှာတော့ မြို့တော် ဂျာကာတာ ရဲ့ ရှုခင်း ကို မြင်ကွင်းကျယ် ခံစား နိုင်မှာပါ။ ပူအိုက် စိုစွတ်လှတဲ့ ဂျာကာတာ ရဲ့ ရှုခင်း ကို ထောင့် အမျိုးမျိုးကနေ ချွေးတလုံး လုံး နဲ့ ဓါတ်ပုံ ဗွီဒီယို ရိုက် နေတဲ့ နိုင်ငံတကာ ခရီးသွား တွေလဲ မနည်းလှပါဘူး။

တစ်ခေါက်မှာ မိုနာ့စ်က အပြန် ပါဆာဘာရူး (Pasar Bharu - New Market) ကို သုံးဘီး ဆိုင်ကယ် နဲ့ ရောက်ခဲ့ပါတယ်။ ရှေးဟောင်း ပစ္စည်း တွေ ရောင်းတဲ့ ဆိုင်း တန်းတွေကို လူရှုပ်ရှုပ် ကို ဆန်ပြီး ဖြတ်အပြီး မှာ ဂျာကာတာ ရဲ့ ရုံးကန် လှုပ်ရှား နေရသူ အခြေခံ လူတန်းစား တွေရဲ့ ဘ၀ကို တစ်စိတ် တစ်ဒေသ မြင်သာ နိုင်ပါတယ်။ မိုးမျှော် တိုက်ကြီးတွေ၊ အဆင့်မြင့် ရှော့ပင်းစင်တာကြီး တွေ၊ အကောင်းဆုံး စားသောက်ဆိုင်ကြီးတွေ၊ ကြယ်ငါးပွင့် ဟော်တယ်ကြီး တွေကို နောက်ဆုံးပေါ် ဇိမ်ခံကား မျိုးစုံ နဲ့ သွားလာစား သောက် နေနိုင်တဲ့ သူတွေ အများကြီး ရှိသလို ကြိုက်လွန်းလှတဲ့ ကိုပီဂျာဟေး (Kopi Jahe - ဂျင်းနံ့ ပါတဲ့ ကော်ဖီ) ကို တစ်ထုပ် ရူပီးရား နှစ်ထောင် (မြန်မာငွေ နှစ်ရာကျပ်ခန့်) ကို မကြာခဏ မသောက် နိုင်တဲ့ သူတွေ နဲ့ လဲ တွေ့ ခဲ့ ရပါတယ်။ ကျနော် Grand Hyatt ဟိုတယ် လော်ဘီ အပေါက်နားမှာ ဆေးလိပ်သောက်နေတုန်း နောက်ဆုံးပေါ် ကားအမျိူးမျိူး မောင်းဝင်လာပြီး ဟိုတယ် ၀န်ထမ်းကို ကားသော့ ပစ်ပေး ပြီး ၀င်သွား တဲ့ ချမ်းသာသူ လု့ မလိုင်များ စွာ ကို တွေ့ ခဲ့ရသလို၊ သံချိတ် အကောက် တတ်ထားတဲ့ တုတ်တစ်ခြောင်း ကိုကိုင်ပြီး ဆာလာအိပ် အကြီးကြီး ထဲမှာ ပလတ်စတစ်၊ သံတိုသံစ စတာ တွေ လိုက်ကောက် နေတဲ့ ဒေသခံ ကြီးကြီး ငယ်ငယ် တွေကို လဲ တွေ့ခဲ့ ရပါတယ်။

ပါးမှာ သနပ်ခါး ပါးကွက်ကြားနဲ့ ပေါင်မှာ သေးစီးကြောင်း နဲ့ လုံမငယ် လို မိုးမျှော်တိုက်တာ အဆောက် အအုံကြီးတွေ၊ စီးပွားရေးစင်တာ ကြီး တွေ ရဲ့ ပြင် ပမှာ ဂျာကာတာ မြို့ ကို ပါတ်စီးနေတဲ့ ရေဆိုးထုပ် မြောင်းကြီး ဟာ မြစ်ကြီး တစ်စင်းလို ဖြစ်နေပြီး အမှိုက်သရိုက် ပလတ်စတ် တွေနဲ့ ပေါလော ပေါ် နေတာကိုလဲ မသတီစရာ တွေ့ မြင်နိုင်ဦးမှာပါ။ အခြေခံ နဲ့ အလယ် အလတ်တန်းစား တွေအားကိုးရတဲ့ ဘတ်စကား မှတ်တိုင် တွေမှာ လူတွေ စုပြုံ တိုးအုံ နေလေ့ရှိပြီး ဂျာကာတာ ရဲ့ ဆင်ခြေဖုန်း တွေ ဖြစ်တဲ့ ဘိုဂိုး (Bogor)၊ တင်ဂါရန် (Tingaran) စတဲ့ မြို့ငယ်လေးတွေ နဲ့ သွားလာ ချိတ်ဆက် မယ့် လူတွေ နဲ့ ဂျာကာတာ တီမော၊ ဘာရတ်၊ ဥတရ၊ ဆယ်လာတန် (Jakarta - Timor, Barat, Utara, Selatan - ဂျာကာတာရဲ့ အရှေ့၊ အနောက်၊ တောင်၊ မြောက်) ကို သွားလာ ကြမယ့် သူတွေ ဒွေးရော ယှက်တင် ရှိပါလိမ့်မယ်။

တစ်ခေါက်မှာ တော့ မနက် ကိုးနာရီ ကျော်ခန့် အလုပ်ကိစ္စရှိတဲ့ ရုံးတစ်ရုံး ကိုရောက်တော့ သူတို့ ရုံး က မဖွင့် သေးပါဘူး။ ခက်တာက ကိုယ့် မှာ ကလွယ်မထား အပ်တဲ့ ပြဿနာ မကြာခင် ပေါက်ကွဲ တော့ မယ့် အခြေ အနေ ဆိုတော့ အဲဒီရုံး က လုံခြုံ ရေး အစောင့် ကို ကိုး နာရီကျော် နေသည့် တိုင် မဖွင့် သေးတဲ့ အကြောင်း စိတ်မရှည် တဲ့ လေသံ နဲ့ အပြစ်တင် ပြေဆိုမိပါတယ်။ အမှန်က ဂျာကာတာ နဲ့ ဘာလီ စံတော်ချိန် မတူပဲ တစ်နာရီတိတိ ကွာ တာ ကို ကျနော် မေ့နေတာပါ။ ခက်တာ က သူ့ နေနဲ့ လဲ ဖွင့် ပေးလို့ မရပါဘူးတဲ့။ တိုးအော်ပရေတာ ဆိုတာ ဘယ်နေရာ ဘယ်ဒေသက ဟော်တယ် မဆို ရင်းနှီး ကျွမ်းဝင် သလို မျိုး ဆိုတော့ အနီးဆုံး ကြယ်ငါးပွင့် ဟိုတယ်၊ ဟိုတယ် နီကိုး (Hotel Nikko - Pusat Jakarta) ကိုပဲ အမြန်ဆုံး နည်းနဲ့ သုတ်ခြေတင် ရပါတယ်။ ကိစ္စပြီး မှ အပွိုင့်မင့် ရှိရာ စောစောက ရုံး ကို ပြန်ပြေးရပါတယ်။ အဲဒီတစ်ခေါက် အဆိုပါ ရုံး က အပြန်မှာ ရိုဂျာ့ (Malay / Singapore - Rojak: Indonesia - Rujak) တစ်ပွဲစား၊ ရေသန့် ဘူးကြီးကြီး ၀ယ်ပြီး ယခု လက်ရှိ အမေရိကန်သမ္မတဘာရက်ဟူစိန်အိုဘားမား (President Barack Hussien Obama) တက်ခဲ့ရာ မူလတန်း ကျောင်းကလေး ကို ကြည့်ချင် လို့ ပြင်းထန် တဲ့ နေရောင်အောက် မှာ နာရီဝက်ကျော် လမ်းလျှောက် ပြီှးရှာ ခဲ့ရပါတယ်။


အစက တော့ ဘာရက်အိုဘားမား ကလေး ပုံ ကြေးရုပ်ကို မန်တန် ပန်းခြံ (Menteng) မှာ ထားခဲ့ ပေမယ့် နောက် ပိုင်း မှာ အကြောင်းအမျိုးမျိုး ကြောင့် သူငယ်ငယ် က တက်ခဲ့ ရာ မူလတန်း ကျောင်း ကိုပြောင်းရွှေ့ ခဲတယ် လို့ ဆိုပါတယ်။ ဘာရက်အိုဘားမား ဟာ ဖရန်စစ်ကန် အစစ်စီ မူလတန်းကျောင်း (Franciscan Asisi Primary School) မှာ ဘာရီဆိုတိုရိ (Barry Soetoro) ဆိုတဲ့ နာမည် နဲ့ ဇန်န၀ါရီလ ၁ ရက်နေ့ ၁၉၆၈ ခုနှစ် ကျောင်း အပ်ခဲ့ ပြီး သုံး နှစ်တိတိ တက်ခဲ့ ပြီး မိဘတွေ အိမ်ပြောင်းရွှေ့ တဲ့ အတွက် ယခု ဘာဆုကီ အလယ်တန်းကျောင်း (Besuki 01 Elementary School, Menteng) မှာ အမေရိကန်နိုင်ငံ ဟာဝိုင်ယီ ကို မပြောင်းရွှေ့ ခင် အထိ တစ်နှစ် တက်ခဲ့တယ် လို့ ဆိုပါတယ်။ အိုဘားမား တက်ခဲ့ တဲ့ ကျောင်း ကလေး က အပြန်မှာ ညနေ စောင်း နေပေမယ့် နေရှိန် ကတော့ မကျ သေးပါဘူး။ လမ်း အကြာ ကြီး လျှောက် ခဲ့ ရလို့ ပင် ပန်း နေတဲ့ ကျနော် ဟာ ကျောင်းလမ်း ထိပ်က ဆိုင်ကယ် တက္ကစီ ကိုငှား ပြီး လေဆိပ် ကို သွားတဲ့ ဘတ်စတေရှင် ကိုသာ ငှားလိုက်ပါတော့ တယ်။

အမှန်တကယ် တော့ မြို့တော် ဂျာကာတာ ဟာ ရက် အနည်းငယ် အချိန်ပေးပြီး လည်ပတ်မယ် ဆိုရင် အပိုင်း (၃) ပိုင်း ပိုင်း ပြီး လေ့လာသင့်ပါတယ်။ ရှေးဟောင်း အဆောက် အအုံတွေ၊ ဗလီ တွေ နဲ့ ခရစ်ယန် ဘုရားရှိခိုးကြီး တွေ ကို တစ်ပိုင်း၊ ယဉ်ကျေးမှု့ အမွေ အနှစ် တွေ ကို ပြခန်း၊ ပြတိုက် တွေမှာ လေ့လာဖို့ က တစ်ပိုင်း ထားပြီး ကျန်တဲ့ အပိုင်းကို တော့ ရှော့ပင်၊ စားသောက် ဆိုင်တွေ နဲ့ အပန်းဖြေ ပန်းခြံ၊ တိရိစ္ဆာန်ဥယျာဉ် တွေ ကို တစ်ပိုင်း ဆိုပြီး လမ်းသင့် သလို အချိန်ရှိသမျှ လေးကို စီမံ ခန့် ခွဲပြီး လေ့လာသင့် တယ်လို့ ဆိုရမှာပါ။

ဂျာကာတာ မှာ ဆုမတြား ကနေ အနောက် ပါပူးဝါး အထိ ကျွန်းပေါင်းစုံ က လူတွေကို သွင်ပြင် အမျိုးမျိုး ကွဲပြားစွာ တွေ့ ရမှာ ဖြစ်ပါတယ်။ ဂျာကာတာ က လူတွေ ပြောတဲ့ အင်ဒိုနီးရှန်း ဟာ အရမ်းမြန်ပြီး အင်ဒိုနီးရှန်း နဲ့ ဂျာဗား စကား ရောယှက် ပြီး ပြောတာ ဖြစ်လို့ ကျနော့် အတွက် နားလည်ဖို့ အင်မတန်ခက်ခဲပါတယ်။ ရှော့ပင်းစင်တာ တွေမှာ တွေ့ရတဲ့ အင်ဒိုနီးရှန်း တွေဟာ တီဗွီဇာတ်လမ်းတွေထဲ ကထက် ပိုပြီး သန့် ပြန့်ချောမော ကြပါပေတယ်။ ဆင်ခြေဖုံး ကလူ တွေ ကိုလည်း ဇာတ်လမ်းတွေ ထဲမှာ ထက် ပိုပြီး ခက်ခဲ စွာ အပမ်းတကြီး ရုန်းကန် နေရတာ ကို မမျှ မတ တွေ့ ရမှာ ဖြစ်ပါတယ်။

အင်ဒိုနီးရှားရဲ့ ပြည်တွင်း လေကြောင်း တွေရဲ့ ထုံးစံ အတိုင်း သတ်မှတ်ချိန်ထက် နောက်ကျပြီး မှ ဘာလီ ကိုပြန်ရောက် လာတဲ့ ကျနော်ဟာ (အခေါက်တိုင်းလိုလို) နောက်တစ်နေ့ မနက် နှစ်နာရီမှ သာ အိမ်ကို ပြန်ရောက်ပါတော့တယ်။ ဂျာကာတာ ကိုရောက် ခဲ့ တဲ့ ခဏတာ လေး တွေဟာ အပူနဲ့ အအေး၊ အမြင့် နဲ့ အနိမ့်၊ ချမ်းသာ ခြင်း နဲ့ ဆင်းရဲခြင်း တွေကို တပြိုင် နက်ထဲ ခံ စားလိုက် ရတဲ့ အိမ်မက် ဆန်ဆန် ဖြစ်ရပ်တွေ ချည်း သာ စိတ် အမြင် မှာ စွဲ ထင်နေပါတော့တယ်။ ။

ဝိဟာရမဟာဝိဟာရ ဂရဟ ဗုဒ္ဓဘာသာ အသင်း (ဘတ်စကားပေါ်မှ AATO)

ပြည်ထောင်စုသမ္မတမြန်မာနိုင်ငံတော်သံရုံး - ဂျာကာတာ (AATO)

ပြည်ထောင်စုသမ္မတမြန်မာနိုင်ငံတော်သံရုံး - ဂျာကာတာ (AATO)

ဂျာကာတာဆင်ခြေဖုံး (ဘတ်စကားပေါ်မှ AATO)

ဂျာကာတာမြို့လည်တစ်နေရာ (လူကူးကုန်းကျော်တံတားပေါ်မှ AATO)

ဖြည့်စွက်ချက်။ ။ ဂျာကာတာ မှာရိုက်လာတဲ့ ဓါတ်ပုံ တွေ အများစု က မှားပြီး ဖျက်မိသွားလို့ ဘာမှ မကျန်တော့ ပါ။ သို့ ပေမယ့် ကွန်မန့် ပေးလာတဲ့ ဦးပေါက်စ ကိုကျေနပ် စေချင်လို့ ရိုက်ခဲ့တဲ့ အထဲ က ရှိတာလေး တွေတင်လိုက် ပါတယ်။ ပြည့်စုံ သွားလိမ့် မယ်လို့တော့ မထင်ဝံ့ ပါ။
updated 30th March 2012: AATO

Photos:
- Monas - Warsi
- Jakarta Macet - Jarkarta Post
- Cock - (JP/ID Nugroho) Jakarta Post
- Plaza Indonesia - Hkurniawan dari Wikitravel
- Barack Obama Statue - (Jakarta Post, Feb. 24, 2010)

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ကိုမိုဒို ဖွတ်နဂါးကြီးများ ရာဇ၀င်

Photo

ဖွတ်နဂါးကြီး တွေအကြောင်း နဲ့ ဆက်စပ် ပါတ်သက်သမျှအားလုံးလိုလို ဟာ စိတ်ဝင်စားဖွယ်၊ ထိတ်လန့် ကြောက်မက်ဖွယ်၊ အူလှိုက် အသည်းတုန် ရွံရှာ ဆက်ဆုပ်ဖွယ် ရာများချည်း ဖြစ်ပါတယ်။ ရက်စက် ကြမ်းကြုပ်တဲ့ ဟန်ပန်အမူအယာ များနဲ့ ကြောက်မက်ရွံရှာဖွယ် သွင်ပြင်လက္ခဏာများရှင် ဖွတ်နဂါးကြီး တွေဟာ ဒဏ္ဍာရီ ပုံပြင် တွေထဲမှာ ပါလေ့ရှိတဲ့ နဂါးကြီးတွေ လို အစိမ်းရောင်သန်းနေတဲ့ မွဲညစ်ညစ် ညိုမည်းမည်း အကြေးခွံထူထူ ဖုံးလွှမ်းထားတဲ့ ခန္ဓာကိုယ်၊ နှာခေါင်းပေါက် ကျယ်ကျယ်၊ သွားရည် တမြားမြား ဖြစ်နေတဲ့ ပါးစပ်ပေါက်ထဲက ချွန်မြမြ သွား တွေ ရဲ့ ကြားက လျှာ နှစ်ခွ ထွက်နေပုံ ဟာ ရုတ်တရက် မီးလျှံ တွေ ထွက်ကျမလာ နိုင်တာ သိ ပေမယ့်လဲ စိုးရိမ်ထိတ်လန့် မှု့ ကို တော့ဖြင့် မလျော့ကျ စေပါဘူး။

အမှန်တကယ်တော့ အနှီ ရက်စက်ကြမ်းကြုပ်တဲ့ သတ္တ၀ါကြီး တွေဟာ ကမ္ဘာ့ အကြီးဆုံး ဖွတ်ကြီး တွေဖြစ်ပြီး အင်ဒိုးနီးရှား နိုင်ငံ ကိုမိုဒို (Komodo)၊ ရင်ကာ (Rinca)၊ ပါဒါ (Pada) နဲ့ ကိုမိုဒိုကျွန်း အနီးနားတ၀ိုက်က ကျွန်း ကလေးတွေပေါ်မှာ နေထိုင်ကျက်စားပါတယ်။ ကိုမိုဒိုဖွတ်နဂါး တွေဟာ သားကောင်း တွေကို အမဲလိုက်ပြီး အရှင်လတ်လတ် ကိုက်ဖြတ် ဆုတ်ဖြဲစား သလို၊ အကောင်အသေတွေကိုလဲ မြိန်ရေယှက်ရေ စားပါသေးတယ်။ နောက်တစ်ချက်ကတော့ ကြီးနိုင်ငယ်ညှင်း ပုံစံ မျိုး ဇာတ်တူသားလဲ စားပါတယ်။ သူတို့ ဘာတွေစားတယ် ဆိုတာ အတိအကျ စာရင်းလိုက်ကောက်လို့ မရ နိုင်ပေမယ့် အနည်းဆုံး ဆယ်ရာခိုင် နှုံးက ဖြင့် ဇာတ်တူသား တခြားဖွတ် တွေကို စားတယ်လို့ ဆိုပါတယ်။

Photo

သူတို့ ဟာ ဖြုန်းကနဲ ကမူးရှုးတိုး ပုံစံ မျိုး အလျှင်အမြန် ပြေးနိုင် သလို ရေကူးကလဲ တော်ပြန်ပါသေးတယ်။ သူတို့ ထက် ပိုမြန်တဲ့၊ ပိုသန်မာတဲ့ ကျွဲလို နွားလို သားကောင်တွေကို တောင်တစ်ချက် အမိအရ ကိုက်လိုက်ခြင်း အားဖြင့် သူတို့ ပါးစပ် က တတောက်တောက် ကျနေတဲ့ သွားရည် တွေထဲ က ဘက်တီးရီးယား မျိုးစုံ ကြောင့် တဖြည်းဖြည်း နှေးကွေး လေးလံ ပြီး ဆက်မသွားနိုင်တော့ ပဲ ခန္ဓာကိုယ် အစိပ်အပိုင်းတွေကို ရက်ရက်စက်စက် ကိုက်ဖြတ် ဆုတ်ဖဲ့ စားခြင်း ကို အရှင်လတ်လတ် ခံရ ပါတယ်။ အကိုက်ခံ လိုက်ရတဲ့ သားကောင် နောက် ကို သူတို့ ရဲ့ ထူးခြား လှတဲ့ အနံ့ ခံ အာရုံ အပြင် ပြူတစ်ပြူတစ် ထွက် နေတဲ့ လျှာ ကြီး နှစ်ခွ နဲ့ ခြေရာခံပြီး သေအံ့မူးမူး ဖြစ် နေတဲ့ သားကောင် ကို ကိုက်ဖဲ့ ပြီး စားပါတယ်။

ဖွတ်နဂါးကြီးတွေ ဟာ အသက် ငါးနှစ်က ဆယ်နှစ် အတွင်း မှာ အရွယ်ရောက် ပြီး မိတ်လိုက် နိုင်ကြပြီး မှတ်တမ်းများ အဆိုအရ အသက် ငါးဆယ် ကျော် အထိရှင်သန် နေထိုင်ပါတယ်။ မိခင် ဖွတ်နဂါးမကြီး က ဥဥ ဖို့ အသိုက်ဆောက်လုပ်ပြီး တခါဥ ရင် ဥပေါင်း သုံးဆယ်ကျော် ဥလေ့ ရှိပါတယ်။ ဖွတ်နဂါး ပေါက်ကလေး တွေ ဥခွံ ထဲက ကိုယ့်ဖာသာ ဖောက်ထွက် နိုင်ဖို့ ကိုးလ လောက် ကြာတတ်ပါတယ်။ အကောင်ပေါက် ကလေးတွေဟာ ဥက ဖောက် ထွက် နိုင်တာ နဲ့ ချက်ချင်း နီးစပ်ရာ အပင်ကြီး ပေါ်တွေကိ ပြေးတက်ကြရပါတယ်။ ဒါမှသာ တခြား အရွယ်ရောက်ပြီး ဖွတ်နဂါးကြီးတွေ ရဲ့ အစာ ဖြစ်က လွတ်ကင်း မှာ ဖြစ်ပါတယ်။ သူတို့ လေးတွေဟာ သစ်ပင်ကြီး တွေပေါ်မှာ ပဲ ကိုယ့် ကိုယ်ကို ထိန်းကျောင်း နိုင်တဲ့ လေးနှစ်သား အရွယ် လောက်အထိ နေကြရပါတယ်။

တကယ်လို့ သာ ကမ္ဘာ့ အံ့ဖွယ် ရှစ်ခုသာ ရှိခဲ့ မယ်ဆိုရင် အဲဒီရှစ်ခုမြောက် ဟာ ကိုမိုဒိုကျွန်းသာ ဖြစ်ပါလိမ့် မယ်။ သားရိုင်း တိရိစ္ဆာန် ကျေးငှက် များစွာ ရှိတဲ့ အင်ဒိုနီးရှားရဲ့ ဧရိယာ အကျယ် အ၀န်းဟက်တာပေါင်း ငါးသောင်းကိုးထောင် ရှိတဲ့ အမျိုးသား ဥယျာဉ်ကြီးထဲ က သုံးထောင်ကျော်သော ကိုမိုဒိုဖွတ်နဂါးကြီး တွေ (Komodo Dragons or Varanus Komodoensis) ဟာ ကမ္ဘာဦးက ဒိုင်နိုဆော မျိုးနွယ် တွေရဲ့ အကြီးမားဆုံးသော နောက်ဆုံး လက်ကျံ မျိုးဆက် ပဲဖြစ်ပါတယ်။ အကယ်၍ စာဖတ်သူ ဟာ ကျနော် အထက်က ရေးခဲ့ တာတွေကို မယုံ နိုင်ဘူး ဆိုရင်လဲ လက်ခံ ပါတယ်။ ဘာလို့လဲ ဆိုတော့ ကျနော် ပြောတာ နားထောင် ဖူးသူ မှန်သမျှ ဟာ မယုံကြည်တဲ့ မျက်ဝန်း တွေနဲ့ ကျနော် ကိုစိုက် ကြည့် ပြီး ဟုတ်ကော ဟုတ်ကဲ့ လား ဆိုတဲ့ မေးခွန်း ကိုသာ အကြိမ်ကြိမ် ပြန်မေးတာ ကြားခဲ့ရဖူးလို့ ပါ။

Photo

ဒေသခံ တွေဟာ ကိုမိုဒိုနဂါးကြီး တွေကို အိုရာ (Ora) လို့ ခေါ်ကြပါတယ်။ အဖိုး၊ ဒါမှမဟုတ်ရင် အဖွားလို့ အဓိပ္ပါယ် ရပြီး လူသားစင်စစ် ကနေ ပြောင်းလဲ ထားတယ် လို့ ယုံကြည်ကြပါတယ်။ ဒေသခံ တွေဟာ သူတို့ရဲ့ မြေး မြစ်တွေ ဖြစ်လို့ အန္တရာယ် မပေးဖို့ တောင်းပန်လေ့ရှိပါတယ်။ အဆိုပါ ဖွတ်နဂါးကြီးတွေဟာ အရှည် ဆယ်ပေ ကနေ ဆယ့်ငါးပေ ခန့် အထိ ရှိတတ်ပြီး ရှေ့ ခြေကို ထောက်ပြီး ခေါင်းထောင် လိုက်မယ် ဆိုရင် သုံးလေးပေလောက် အထိ မြင့် ပါတယ်။ အလေးချိန်အားဖြင့် ပေါင် တရာ့ငါးဆယ် ကနေ ပေါင် သုံးရာလောက် အထိကြီးထွား လေ့ရှိပါတယ်။ အပြေး မြန်သလို တွင်း အနက်ကြီးတွေကို လဲ တူးနိုင်ကြပါတယ်။ ရေကူး၊ ရေငုတ်တော် ပြီး အကောင်ငယ်လေး တွေ ဆိုရင် သစ်ပင် အမြင့် ကြီး တွေကိုပေါ်ပါ တက်နိုင်ကြပါတယ်။

သူတို့ ရဲ့ အစာ တွေဟာ အများအား ဖြင့် ဆိတ်၊ သမင်၊ ဒရယ်၊ မြင်း၊ တောကျွဲ၊ တောဝက် စသည်ဖြင့် ကျွန်းပေါ် မှာရှိတဲ့ တောနက် ထဲ မှာ ရှင်သန်နေထိုင် တဲ့ တောရိုင်း တရိစ္ဆာန်တွေ အပြင် ဒေသခံ တွေ မွေးထားတဲ့ ကြက်၊ဘဲ၊ ဆိတ်၊ကျွဲ စတာ တွေကို ပါ လစ်ရင် လစ်သလို ၀င်ဆွဲလေ့ ရှိပါတယ်။ ဖွတ်နဂါးကြီးတွေရဲ့ ပိုင်နက် နယ်ပါယ် ဟာ ကိုမိုဒို သဘာဝဥယျာဉ် လို့ သတ်မှတ်ထားတဲ့ ကိုမိုဒို၊ ရင်ကာ၊ ပါဒါ နဲ့ ကိုမိုဒို ကျွန်းဝန်းကျင် က ကျွန်း ကလေး တွေ တ၀ိုက် တင် မကသေးပဲ ဖလောရက်စ် (Flores Island) ကျွန်းတ၀ိုက်မှာ ပါ ခဏခဏ တွေ့ရလေ့ ရှိလို့ အဆိုပါ နေရာမှာလဲ နေထိုင် ကျက်စားတယ် လို့ မှတ်ယူရမှာ ဖြစ်ပါတယ်။

Photo

တကယ်လို့ တစုံတယောက် ကနေ ကိုမိုဒိုနဂါးကြီးတွေ ဟာ အန္တရာယ် ရှိသလားလို့ မေးလာခဲ့ ရင် အဖြေက ရှိတယ်၊ မရှိဘူး နှစ်မျိုး ဖြစ်နေပါလိမ့် မယ်။ အကြောင်းသိတဲ့ ဒေသခံ တွေအတွက်အန္တရာယ် မရှိနိုင်ဘူး ဆိုပေမယ့် တိုးရစ် လိုမျိုး ခဏတာ လာလည်တဲ့ သူတွေ အတွက် ကတော့ အင်မတန် အန္တရာယ် ကြီးပါပေတယ်။ ကိုမိုဒို ကျွန်းပေါ်မှာ ခြေရာ လက်ရာ အစအန မကျံ အောင် ပျောက်ဆုံး သွားခဲ့ ကြတဲ့ ကံဆိုးသူ တိုးရစ် တွေ ရှိခဲ့ ဖူးပါတယ်။ အကယ်၍ အင်ဒိုနီးရှားက ကိုမိုဒို အမျိုးသား ဥယျာဉ်ကို လည်ပါတ်ခွင့် ကြုံလာခဲ့မယ် ဆိုရင် အမျိုးသားဥယျဉ်က ချမှတ်ထားတဲ့ လမ်းညွှန်ချက် စည်းကမ်းတွေကို အလေးအနက် လိုက်နာဖို့ လိုပါလိမ့်မယ်။ အထူးသဖြင့် အနီရောင် အ၀တ်အစား တွေကို မ၀တ်မိဖို့ ပါပဲ။ အကယ်၍ ကိုမိုဒိုဖွတ်နဂါးကြီးတွေသာ သူတို့ ရဲ့ အစာ လို့ မြင်သွားပြီဆိုရင် ဖြင့် ရိုင်ဖယ် သေနတ်ကိုင် ရိန်းဂျား အစောင့် တွေလဲ လုံခြုံအောင် ကာကွယ်ပေးဖို့ တတ်နိုင်လိမ့်မယ် မထင်ဘူး။ ။



ကိုးကား
- ကိုမိုဒို အမျိုးသားဥယျာဉ် ထုတ်စာရွက်စာတမ်းများ
- Paul (Komodo Specialist)
- Flores Tourism
- Wikipedia
- National Geographic Magazine
- ဖလောရက်စ် ဒေသခံ လုပ်ဖော်ကိုင်ဖက် များ၏ ပြောပြချက် များ

Photo credits to:-
- Picture 1 (http://www.infohostel.com/)
- Picture 2 (http://www.komodragonfacts.com/)
- Picture 3 (http://www.komolarges.com/)
- Picture 4 (image.google.com)

ဒုတိယပိုင်း ဖျောက်ထားမည့်စာ

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ဘာလီကို လည်မယ်ဆို

အင်ဒိုနီးရှား ဂုဏ်ဆောင် ဘာလီကျွန်း ဟာ ကမ္ဘာ့ ပထ၀ီမြေပုံပေါ်မှာ သေးသေးလေးသာ မြင်ရမှာ ဖြစ်ပေမယ့် ကမ္ဘာ့ခရီးစဉ်ဒေသ မြေပုံပေါ်မှာတော့ ထင်ထင်ရှားရှား ကျယ်ကျယ်ပြန့်ပြန့် ဖော်ပြရတဲ့ အထင်ကရ ခရီးစဉ်ဒေသတစ်ခု ဖြစ်ပါတယ်။ အကယ်၍သာ ကျွန်းတစ်ပါတ် ကားတစ်စီး နဲ့ ကမ်းခြေ တစ်လျှောက်မောင်း လို့ သာရခဲ့ မယ်ဆိုရင် တစ်နေ့တည်း နဲ့တောင် တစ်ပါတ်ပြည့်အောင် မောင်းလို့ ရစရာ ရှိကောင်း ရှိပေမယ့် ခရီးစဉ် ဒေသ တစ်ခု အတွက် ဆိုရင်တော့ အင်မတန် ကြီးမားတဲ့၊ လည်စရာ၊ လေ့လာစရာ အပြည့်နဲ့ ခရီးစဉ်ဒေသ ကြီး တစ်ခုလို့ ဆိုရမှာ ဖြစ်ပါတယ်။

ဘာလီ ကိုရောက်ဖူးတယ် ဆိုတဲ့ နီးစပ်ရာ အသိမိတ်ဆွေ တွေကို ဘာလီကို ဘယ်လိုမြင်လဲ လို့ သာမေးကြည့် မယ်ဆိုရင် သူတို့ ရဲ့ အမြင်ဟာ ဘာလီမှာ ပွင့်တဲ့ တရုတ်စကားပန်း ဖြူဖြူ လေးတွေလို အဆုပ်လိုက် အခဲလိုက်၊ အပင်ပေါ် ရော အပင်အောက်ရော မှာ ပြန့်ကျဲ နေသလို ကြည်နူးစရာ အဖြေ တွေအများကြီး ရလာမှာ ဖြစ်ပါတယ်။ ဘာလီကိုသာ တစ်ခေါက်လောက် ရောက်ဖူးခဲ့မယ် ဆိုရင် သဲဖွေးဖွေး ကမ်းခြေ ကလေးတွေ၊ သာယာတဲ့ လှေကားထစ် စပါးခင်းတွေ၊ ဒေသခံ ဘုရားဖူးတွေ နဲ့ ပြတ်လေ့မရှိတဲ့ ဘုရားကျောင်းတွေ က ပွဲတော်တွေ၊ ဘာလီ ရိုးရာ တေးသံနဲ့ အကအလှ၊ ကမ်းခြေမှာ တလူလူလွင့်နေတဲ့ တံခွန်တိုင် တွေ ဟာ စိတ် အစဉ် ပုံရိပ်ထဲ မှာ နှစ်ပေါင်း များစွာ ကြာအောင် စွဲထင် နေမှာ သေချာပါတယ်။

တကယ်တော့ ဘာလီဟာ တိုးပရိုဂရမ် (Tour Program) တစ်ခုနဲ့ ဘောင်ခတ်ပြီး အကန့် အသတ် တစ်ခုအတွင်း မှာ သာလည်လို့ ရတဲ့ ကျွန်းတစ်ကျွန်း မဟုတ်ပါဘူး။ နေ၀င်ရှုခင်း နဲ့ ပင်လယ်စာ အကင် တွေကြောင့် စည်ကားလွန်းလှတဲ့ ဂျင်ဘာရမ် (Jimbaran) ကနေ တိုးရစ်တွေ စက်ကျ တတ်တဲ့ ကုတ (Kuta) လို နေရာမျိုး က နေ စမင်ညာက် (Seminyak) လို ဇိမ်ခံ ဟိုတယ်ကြီးတွေရှိတဲ့ နေရာ အထိ တစ်လျှောက် လုံး ရှည်လျားတဲ့ ကမ်းခြေကြီး အတိုင်း ရက်ပေါင်းများ စွာ အပျော်ရှာ လို့ ရပါတယ်။ ယဉ်ကျေးမှု့ အနုလက်ရာ တွေပြုလုပ်ရောင်းချ တဲ့ တောအုပ်စိမ်းစိမ်း ထဲက ဥဘွတ် (Ubud) ကနေ မီးတောင်တွေ ရှိတဲ့ ဘာလီ ကျွန်း အလည်ပိုင်း ကိုပဲ သွားမလား ဒါမှမဟုတ် အမ်မက် (Amed) တို့ လိုဗီးနား (Lovina) နဲ့ ပန်မျူတာရန် (Pemuteran) တို့ လို ကမ်းခြေမြို့ ငယ်လေးတွေမှာ ရက်တွေလ တွေကို မေ့ထားပြီး နေဦးမလား၊ နောက်ပြီး မျက်စိရှုပ်လွန်းလို့ တိုးရစ် တွေ ကိုမမြင်ချင်ဘူး ဆိုရင်တောင် နူဆာလန်ဘွန်ဂန် (Nusa Lambongan) ကျွန်းက ဖြင့် မလှမ်း မကမ်း မှာရှိနေသေး တော့တယ်။


ပြောရမယ် ဆိုရင် ဘာလီကျွန်းသူ တွေ နေ့စဉ် နတ်တင် လေ့ ရှိတဲ့ အုန်းရွက် ခေါစာ ခွက်ကလေး တွေလိုမျိုး စွဲဆောင်မှူ့ မျိုးစုံ ဟာ အကွက်ညီညီ ယက်ဖောက်ထား တယ်လို့ ပြောရင် မလွန်ပါဘူး။ ဆိုခဲ့ တဲ့ အကြောင်း အရာ တွေဟာ မြင်သာ ထင်ရှားတာလေးတွေ တချို့ကိုသာ စုစည်း ပြီး ပြောသလို ဖြစ်နေပါလိမ့်မယ်။ တကယ်တော့ ဘာလီ ဟာ အင်ဒိုနီးရှား တစ်နိုင်ငံလုံး မှာ ဧည့်သည် နဲ့ သဟဇာတ အဖြစ်ဆုံး (Visitor Friendly) ကျွန်း လို့ ရဲရဲ ကြီး ဆိုဝံ့ပါတယ်။ ရှိပါသေးတယ်။ ဘာလီရိုးရာ အနှိပ် ကလေးခံပြီး၊ ဆေးပေါင်း စပါး (Herbal Spa) မှာ နွမ်းနယ် မှု့တွေ ကိုဖြေလျော့ မလား။ Discovery Shopping Mall နဲ့ မာတာဟာရီ (Mata Hari) မှာပဲ ဈေးဝယ်မလား။ ကရစ်ရှနာ (Krishna) နဲ့ ဘာလီ အနှံ့ က အမှတ်တရပစ္စည်း ဆိုင်တွေ (Oleh Oleh) မှာပဲ လက်ဆောင်ပေးဖို့ ၀ယ်ဦးမလား။ သေချာတာက တော့ ဘာလီက အပြန်ဧည့် သည်တိုင်း ဟာ အလာတုန်းက လိုမျိုး မဟုတ်တော့ပဲ အိပ် အကြီး အသေး မျိုးစုံနဲ့ ပစ္စည်း မျိုးစုံ ပါသွားကြတာပါပဲ။

အစား အသောက် ဆိုရင်လဲ လမ်းဘေး ဈေးဆိုင် (Warung) ကလေးတွေက နေစပြီး ဟိုတယ်ကြီးတွေ နဲ့ ဖိုင်းဒိုင်းနင်း (Fine Dining) ရက်စတောရင့် ကြီးတွေ အထိ တတ်နိုင်သလို နှစ်သက်သလို စားလို့ ရပါတယ်။ မမေ့ရမှာ က ဘာဘီဂူလင်း (Babi Guling) နဲ့ ထမင်းကလေး တစ်ဇွန်းလောက် စားလိုက် ဒါမှ မဟုတ် ဘာလီစတိုင် ပင်လယ်စာ အကင်လေးစားလိုက်၊ ဘင်တန်ဘီယာ (Bintang Beer) ကလေး တကြိုက်လောက် ကြိုက်လိုက်၊ မျက်နှာ ချိုချို ညိုညိုစိုစို ဘာလီမ လေး တွေ ကို ကြည့်လိုက်.. လုပ်ဖို့ ကိုပါ။ :P

ဘာလီကို ဘယ်လိုလာ၊ ဘယ်မှာတည်းပြီး ဘယ်ကိုသွားရမှာလဲ လို့ မေးလာခဲ့ရင် အဖြေက လေယာဉ်လက်မှတ်ဝယ် ပြီးသွားပါ။ ဘယ်မှာ ပဲတည်းတည်း၊ ဘယ်ကိုပဲ သွားသွား မှား စရာ အကြောင်း လုံးဝ မရှိဘူးလို့ သာ ဆိုပါရစေ...။ ။


မှတ်ချက်။ ။ ရေးထားတာ တော့ ကြာပါပြီ။ ဟိုတစ်စ ဒီတစ်စ နဲ့ အဆုံး မသတ်ဖြစ် နေတာပါ။ ဘာလီ ကိုခဏခဏ လာလည်ချင်တဲ့ အစ်မချစ် နဲ့ အစ်ကိုပန်းသီး၊ ခရီးခဏခဏသွား တတ်တဲ့ အစ်မချော၊ အစ်ကိုဧရာ နဲ့ အစ်မသီတာ၊ လာလည်ချင်တယ် ဆိုတဲ့ မေသိမ့်သိမ့်ကျော်၊ တိုးပရိုဂရမ် တွေ တိုးဂိုက်တွေ ရှိလား ဆိုတဲ့ စော (အ၀ါရောင်မြေ)၊ စော ပြောသလိုပါပဲ ဆိုတဲ့ Iora၊ ဘာလီခရီးစဉ် အကြံလေးပေးပါဦး ဆိုတဲ့ သရ၊ ဆရာကိုဟန်ကြည် တို့ နဲ့ တစ်နှစ်တာ နေခဲ့တဲ့ ဘာလီကျွန်း ကို သတိရ၍ ရေးသည်။

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ဘာလီ ငလျင်

ဂဠုံစီးဗိဿနိုးနတ်မင်း

သီတင်းကျွတ်လပြည့် ကျော် ၁ ရက်နေ့။ ။ ကလေး အငယ်ဆုံးလေး နေသိပ်မကောင်းတာ နဲ့ ရုံးက နေခွင့်တိုင် ပြီး အိမ်မှာ ဝေယျာဝစ္စယောဂီ လုပ်နေတုန်း မနက် ၁၁ နာရီလောက် ထင်ပါတယ် ရုတ်တရက် ဂျက်လေယာဉ် အကြီးကြီး တစ်စင်း အနီးကပ် မောင်းလိုက် သလို မျိုး အသံကြီး ဝေါခနဲ ပေါ်လာပါတယ်။ အိမ်နီးချင်း ဒေါက်တာမ က သူ့ ကလေးကိုချီပြီး "ဟီဒို့....ဟီဒို့....ဟီဒို့" နဲ့ ဆက်တိုက်အော်နေတာ နဲ့ ဘာ ဖြစ်တယ် ဆိုတာ မေးလို့ မရနိုင်ပဲ ကြောင် နေမိပါတယ်။ အဲဒီ အခါ မှာ ခင် က ကလေး အငယ်လေး ကိုချီခေါ် လာပြီး အပြင်ကို ထွက်ဖို့ အသည်းအသန်ပြော ပါတယ်။ ဒါပေမယ့် ကျနော့် ရဲ့ သွက်လက် ဖြတ်လတ်တဲ့ ကွန်ပျူတာ ဦးနှောက် က ချက်ချင်း အလုပ်မလုပ်သေးပဲ "ဟီဒို့" ဆိုတာ နဲ့ ဝေါခနဲ ကြားရတဲ့ အသံ ကို စဉ်းစား ဆက်စပ်နေပါတယ်။ နောက်မှ ခြံ တခါး မကြီး က တဗျန်းဗျန်း မြည်လာပြီး အိမ် နှစ်လုံး စလုံး ကို ရုတ်တရက် ဆွဲခါ လိုက်သလို မျိုး လှုပ်သွား တော့ မှ အော်..ငလျင် လှုပ်တာပါ့ လား ဆိုပြီး သဘောပေါက် ပါတော့တယ်။ :)

အဲဒီတော့ မှ ကလေး အကြီး ကို ကျနော်၊ ကလေး အငယ် ကို ခင် က ချီပြီ ဖိနပ် တောင် မစီး နိုင်တော့ ပဲ အိမ်ရှေ့ ကို ပြေးထွက် ကြရပါတယ်။ အိမ်နီး ချင်း ဒေါက်တာမမ ကတော့ ဘာစကား မှ မေးလို့ မရပဲ တ ဟီဒို့ ထဲ ဟီဒို့ နေပါတယ်။ ငလျင်က တော့ သုံးလေး မိနစ် အတွင်းမှာ သုံး ကြိမ်လောက် လှုပ်ခါ ပြီး ငြိမ်သွား ပါတယ်။ အဲဒီမှာ အိမ်နီးချင်း က အိမ်ထဲ ပြေးဝင် ပြီး တီဗွီ ထ ဖွင့် သတင်း မှန်သမျှ ကြည့်ပါတော့တယ်။ အင်ဒိုနီးရှား အစိုးရ က လွင့်ဆဲ လိုင်းအားလုံးကို ဖြတ်ပြီး Breaking News Live ဆိုပြီး တိုက်ရိုက် ငလျင် အကြောင်း ကိုပြောပါတော့တယ်။ တကယ်တော့ ငလျင် ဟာ ဘာလီကျွန်းရဲ့ မြို့တော် ဒန်ပါဆာ ရဲ့ အနောက် မြောက် ဘက် မြေအောက် ၁၀ ကီလိုမီတာ လောက် ကို ဗဟိုပြု ပြီး လှုပ်သွား တာဖြစ်ပြီး ၆.၈ မဂ္ဂနီကျု ရှိပါတယ်တဲ့။

ဟာဝိုင်ယီ အခြေဆိုက် ဆူနာမီ သတိပေးဌာန အဆိုအရ ငလျင်ကြောင့် ဆူနာမီရေးလှိုင်း ဖြစ်နိုင်ဖွယ် မရှိဘူး ဆိုမှ သာ ဟင်းကနဲ သက်ပြင်းချ နိုင်ပါတယ်။ ဖြစ်ရင်လဲ ဆူနာမီဇာတ်လမ်းတွေ၊ သဘာဝဘေးအန္တာရယ် အကြောင်း ဇာတ်လမ်းတွေ ကြည့်ထားပြီး အတွေ့အကြုံ ရှိဖူးထားသလို ဖြစ်နေတော့ သိပ်မကြောက်ပါဘူး။ :) ချက်ချင်းဆိုသလို အထုပ်ထ ပြင်ထားပါတယ် :)) ပတ်စပို့၊ ကလေး စောင်၊ ရေဗူး၊ မုန့်၊ ကလေးချီတဲ့ ခါးပတ် လိုဟာတွေ ကို အဆင်သင့်လုပ်ထားပါတယ်။ အိမ်နီး ချင်း အပြောအရ အဲဒီလို ဘေးအန္တာရယ်မျိုး ကိုရှောင်မယ် ဆိုရင် ကား နဲ့ လုံးဝ အဆင်မပြေ နိုင်ဘူးလို့ ဆိုပါတယ်။ ဟုတ်တယ်လေ။ လမ်းမှာ ပိတ်နေတာနဲ့ပဲ လွတ်မှာ မဟုတ်တော့ ဘူး။ သူ့ မှာ ကဆိုင်ကယ် နှစ်စီး ရှိတော့ အဆင်ပြေတယ် (ဆိုင်ကယ် နှစ်စီး အပြိုင်စီးလို့ ရတာပေါ့ :)) ကျနော်လဲ ဆိုင်ကယ် ကိုလူတွေ အများကြီး နဲ့ မစီး ဘူးတော့ စီးခဲ့ ရင် ဘယ်လို ဆိုတာ ကြိုတွေးထားပါတယ်။

အဆင်သင့် ပြင်ပြီးပြီဆိုတော့ သတင်းတွေကိုပဲ မျက်ခြေမပြတ် စောင့် ကြည့် နေပါတယ်။ လေဆိပ် နားက ကုတ (Kuta) ဆိုတဲ့ နေရာ မှာ ဆောက်လက် စ အဆောက် အအုံ တစ်ခု ပြိုကျ သွားတယ် လို့ ကြေငြာသွားပါတယ်။ နောက်ထပ် ပြီး အာဆီယံထိပ်သီး ဆွေးနွေးပွဲ ကျင်းပမယ့် နူဆာဒူဝါ (Nusa Dua) မှာလဲ ဆောက်လက်စ အဆောက် အအုံ တစ်ခု ပြိုကျ သွားပြန်ပါသတဲ့။ ဘာလီ ရဲဌာန ရဲ့ ဘာလီ အနှံ လမ်းစုံ လမ်ခွ တွေမှာ တပ်ထားတဲ့ စီစီတီဗွီ (CCTV) တွေကို တိုက်ရိုက် ဖွင့် ပြပြီး လက်ရှိ ဖြစ်ပျက်နေတာ ကို ပြပါတယ်။ ဘာလီရဲ့ နေရာ ဒေသ အစုံ ကလူတွေကို ဖုန်းဆက်ပြီး တိုက်ရိုက် မေးမြန်း ချက်တွေကို ထုတ်လွှင့်ပါတယ်။ ဘယ်နေရာတွေမှာ ဘာဖြစ်နေတယ် ဆိုတာ တီဗွီသတင်း ကြည့်နေရင်းနဲ့ သိလို့ စိတ်မပူတော့ ပါဘူး။ ဘာမှ မသိရတာ သာ ကြောက်စရာ မလား။



နိုင်ငံတကာ သတင်းဌာနတွေ ကလဲ နေရာ အနှံ့ က နိုင်ငံတကာ ခရီးသွားဧည့်သည် တွေကို အင်တာဗျူးပြီး တိုက်ရိုက် ထုတ်လွှင့်ကြပါတယ်။ အင်ဒိုနီးရှား အစိုးရ ငလျင်သတိပေး ဌာနကနေ လုံးဝ စိုးရိမ်စရာ မရှိတဲ့ အခြေ အနေမျိုးထုတ်လွှင့် ပြီးတဲ့ အခါမှ အားလုံး စိတ်ချလက်ချ နေနိုင်ပါတော့တယ်။ အိမ်နီးချင်း ဘာလီ လူမျိုးကတော့ ဘာလီကျွန်းကို နတ်ဒေ၀တာ တွေ အမြဲစောင့်ရှောက်တဲ့ အတွက် သဘာဝဘေး အန္တာရယ်တွေက နေ ကင်းလွတ်နေတယ် ဆိုပါတယ်။ ဘူမိဗေဒပညာရှင်တွေအဆို အရ ဂျာဗားကျွန်းမကြီး နဲ့ ဆက်စပ်မှု မရှိတဲ့ ဘာလီကျွန်းဟာ ငလျင်အန္တာရယ် ဖြစ်နိုင်ခြေ ဟာ တခြားကျွန်းများ နဲ့ တန်းတူမဟုတ်သည့် တိုင် ကွာခြားချက် သိပ်မရှိလှဘူးလို့် ဆိုပါတယ်။ ဒါပေမယ့် အင်ဒိုနီးရှား မှာငလျင်နဲ့ ဆူနာမီလို သဘာဝဘေးအန္တာရယ် ကြုံတိုင်း အစိုးရအရာရှိကြီးတွေ နဲ့ ပညာရှင်တွေ ဘာလီကျွန်း ဘာကြောင့် ကွက်ကွက် လေး ကျန်နေခဲ့တယ် ဆိုတာ တအံ့တသြ ဆွေးနွေးကြရတယ် လို့ ပြောစမတ်တွင်ပါတယ်။

ဒါကြောင့်လဲ ဘာလီ ကို နတ်ဒေ၀တာတွေ စောင့် ရှောက်ထားတဲ့ မီးလျှံစက်ကွင်း ထဲက ကျွန်းလို့ "The Blessed Island of The Ring of Fire"လူတွေပြောကြ တင်စားကြရတာ ဖြစ်ပါတယ်။ ။


ဆက်စပ်ဖတ်စရာ။ ။ မီးလျှံနိုင်ငံ

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ဘာလီ ယဉ်ကျေးမှု့ နှင့် ဓလေ့ထုံးတမ်း အစဉ် အလာများ မိတ်ဆက် အပိုင်း (၂)

အပိုင်း (၁) ၏အဆက်

အပိုင်း (၂) အတွက် အမှာ

ဘာလီ ကျွန်းမှာ နေထိုင်စဉ် အတွင်း ဘာလီကျွန်းသူကျွန်းသားတွေရဲ့ လူနေမှူစံနစ်၊ ကိုးကွယ်ရာဘာသာ၊ ယုံကြည်မှု့၊ စာပေနှင့် အနုသုခုမ၊ ဓလေ့ထုံးတမ်း အစဉ် အလာတွေကို လေ့လာမိတဲ့ အခါ အင်မတန်ထူးခြား တဲ့ အတွက် မှတ်စုထုတ်ပြီး တတ်နိုင်သလောက်ရေးမယ် ဆိုပြီးကြံစည် ဖြစ်ခဲ့ပါတယ်။ ရေးတဲ့ အခါမှာ လဲ အကြောင်းအရာလဲ စုံရမယ်၊ တတ်နိုင်သလောက်လဲ ပြည့်စုံရမယ်ဆိုပေမယ့် တကယ်တမ်း ရေးရရင် သေချာ သုတေသနလုပ် ရေးရမှာဖြစ်ပြီး မနုဿဗေဒ ဆိုင်ရာကျမ်းတစ်စောင် လို အချက်အလက် အသေးစိပ်တွေနဲ့ ပဲ ပြည့်နှက်နေမှာဖြစ်ပြီး အဲဒီအချက် အလက်တွေ စုဆောင်းဖို့ က နှစ်အတော်ကြာ အချိန်ပေးရမှာ ဖြစ်ပါတယ်။ သဘောအရ အင်မတန်ရှုပ်ထွေးလှတဲ့ လက်ရှိအလုပ် နဲ့ မိသားစု အရေးကိစ္စတွေ ထမ်းဆောင်နေရတဲ့ ကျနော့်လို ပုဂ္ဂိုလ် မျိုး မှာ အဲဒီလိုမျိုး အားထုတ်ဖို့ စွမ်းအား အင်မတန်နည်း လွန်းတာ လဲ ကိုယ့်ဖာသာ နားလည်ထားပါတယ်။ သို့ပါသော်လည်း ရေးချင်တဲ့ စိတ်က အသာစီးရတဲ့ အတွက် အနည်းဆုံးတော့ အားလုံးလဲခြုံမိအောင် မိတ်ဆက် သဘောမျိုး အကြောင်းအရာ ပေါင်းစုံ ပါအောင်ရေးမယ် ဆိုပြီး ရေးဖြစ်ခဲ့ပါတယ်။ စ ပြီးရေးမိတဲ့ အခါကျ မှ အင်မတန် ကျယ်ပြန့်ပြီး အင်မတန်ရှုပ်ထွေး ပြီးဆင်တူရိုးမှား ဓလေ့ထုံးစံတွေနဲ့ မူကွဲ တွေ က ကျွန်းတစ်ကျွန်းတည်းပေါ်မှာ ဖြစ်ပေမယ့် နေရာဒေသ နဲ့ မတူသောလူတန်းစား များ (Caste System) အပေါ်မူတည် ပြီး ကွဲပြား နေသေးတာ သိရပြန်ပါတယ်။

ဘာလီရိုးရာ နေအိမ် (Kuren)

ဘာလီက ရိုးရာအိမ်တွေအကြောင်း ပြောမယ်ဆိုရင် ဗိသုကာ ရှု့ထောင့် ကနေလေ့လာစရာ အနည်းဆုံး (အနည်းဆုံး) သုံးမျိုး ရှိပါတယ်။ ပထမတစ်မျိုးကတော့ ခြံ သို့မဟုတ် အိမ်ဝိုင်းထဲမှာ အဆောက်အအုံ လေး လုံး နဲ့ မိသားစု ဘုရားကျောင်းဆောင်များ နေရာ မျှသာဖြစ်ပါတယ်။ ဒုတိယတစ်မျိုးက တော့ အိမ်ဝိုင်းထဲ မှာ အိမ်တစ်လုံး တည်း ဆောက်ထားတဲ့ အိမ်မျိုး ဖြစ်ပါတယ်။ ဒါပေမယ့် တခါတရံ မီးဖိုဆောင် ကို သီးသန့် အိမ်ဘေး မှာ ဆောက်ထားတတ်ပါသေးတယ်။ တတိယ တစ်မျိုးကတော့ စုပေါင်းအိမ် (Housing Complex) ဖြစ်ပါတယ်။ ညီအစ်ကို မောင်နှမ၊ ဦးလေးအဒေါ် စသည်ဖြင့် မတူတဲ့ အိမ်ထောင်စု တွေ စုပေါင်း နေထိုင်ရာ အိမ်တန်းရှည် နှစ်ခု ဟာ ခြံ သို့ မဟုတ် အိမ်ဝိုင်းရဲ့ ဘယ်နှင့် ညာ တစ်ဘက်တစ်ချက် မှာ ဆောက်ထားတာ ဖြစ်ပါတယ်။ နောက်မှ နံရံတစ်ခု ကာ ပြီး ဂိတ်တံခါး (angkul-angkul) တစ်ခုနဲ့ တံဆာဆင်ပါတယ်။

ဂိတ်တံခါး (angkul-angkul)

အခြေခံအားဖြင့် အဆိုပါ အဆောက်အအုံ များဟာ မြေပြန့် လွင်ပြင်များ မှာ အဆောက်များ ပေမယ့် တောင်စောင်းတွေ၊ ဆင်ခြေလျှော တွေများတဲ့ဘာလီကျွန်း အလယ် ပိုင်းမှာ ဆိုရင်တော့ အနည်းငယ် ကွဲ ပြားပါသေးတယ်။ ဘာလီကျွန်း ကအိမ်အများစု မြေစိုက်အိမ်တွေ ဖြစ်နေတဲ့ အကြောင်း ကတော့ တခြား အင်ဒိုနီးရှားမှာ ရှိတဲ့ ဘာတက်၊ ဒါယက်ခ်၊ ထရိုဂျာ၊ မက္ကဆာ စတဲ့ ခြေတံရှည် အိမ်ဆောက်လေ့ရှိတဲ့ လူမျိုးစုတွေလို တောရိုင်းတိရိ စ္ဆာန် တွေရဲ့ ရန်ကကြောက်စရာ မလို၊ ကာကွယ်ဖို့ မလိုတဲ့ အပြင်၊ ချောင်း မြောင်း တွေကနေ ရေလျှံပြီး အိမ်တွေထဲ ကိုရေ၀င်တာ မျိုးတွေ မရှိလို့ ဖြစ်ပါတယ်။ တကယ်တန်းကျတော့ ဘာလီ လူမျိုးတွေရဲ့ အိမ်တွေဟာ တောရိုင်း တိရိစ္ဆာန်တွေနဲ့ သဘာဝ ရဲ့ ဘေးအန္တရာယ် ကို ကာကွယ်ဖို့ထက် နာမည်ဆိုးနဲ့ ကျော်ကြားတဲ့ ဆူလာဝစီ (Sulawasi)၊ မဒုရ (Maduras)၊ ကလီမင်တန် (Kalimentan @ Indonesia Borneo) စတဲ့ ကျွန်းသား တွေရဲ့ အောက်လမ်းမှော် ပညာတွေနဲ့ ပြုစားခြင်းတွေကို ကာကွယ် ဖို့ တန်ပြန်အထက်လမ်း အစီအရင် တွေထည့်သွင်းဆောက်လုပ်လေ့ရှိပါတယ်။

ဘာလီ လူမျိုးတွေရဲ့ အိမ်တစ်အိမ် ဟာ ဟိန္ဒူ နဲ့ ဗုဒ္ဓဘာသာ အယူအဆ အရ စကြာဝဠာရဲ့ အခြေခံ ဖွဲ့စည်းမှု့ ဓါတ်ကြီးလေးပါး (ရေ၊မြေ၊လေ၊မီး) အပြင် မြေတည်နေရာ၊ ဘုရားကျောင်း၊ သင်းချိုင်းမြေ၊ ဆွေမျိုးအသိုင်းအ၀ိုင်း နဲ့ လူမှု့ အဖွဲ့ အစည်း (Banjar)* စသည်တို့ နဲ့ အကွက်ညီယက်ဖောက် ဆက်နွယ်နေလေ့ရှိပါတယ်။ အိမ်တစ်အိမ် ရဲ့ ဗိသုကာ အဆေက်အအုံ ဒီဇိုင်းလက်ရာ များ ကို မချဉ်းကပ် မှီ အဆိုပါ ဓါတ် သဘောတွေ ဟာ ဆောက်လုပ်မယ့် အိမ်ရဲ့ သဘောသဘာဝ သွင်ပြင် လက္ခဏာများ ဖြစ်လာစေပါတယ်။ အထူးသဖြင့် အိမ်ရဲ့ အနေအထား နဲ့ ဦးတည် မျက်နှာလှည့် တဲ့ အရပ် တို့ ဟာ အလွန်အရေးပါ ပါတယ်။ အနှစ်ချုပ် အားဖြင့် အချက် နှစ် ချက် ကို အထူးအလေးပေး စဉ်းစား ပါတယ်။

၁။ လှေဦးတိုက်၊ လှည်းဦးတိုက် (tumbak runrung) ကို ရှောင်ပြီး ဆောက်လေ့ရှိပါတယ်။ လမ်း က အိမ်ကို လာဆုံနေတာ မျိုး ဆိုရင် လမ်းကို အိမ်က ပိတ်နေသလို မျိုး ဖြစ်ပြီး မမြင်ရတဲ့ ပရလောကသားတွေ အိမ်အတွင်းကို ၀င်နိုင် လို့ ခိုက် တယ်လို့ ယုံကြည်ကြပါတယ်။ အကယ်၍ မဖြစ်မနေ ဆောက်ရတော့မယ် ဆိုရင် ဘုရားကျောင်း ဆောင် ခပ်သေးသေးတစ်ခု လမ်းဦးတိုက် မှာ လမ်းကို မျက်နှာမူပြီး ဆောက်လိုက်ပါတယ်။ ပန်း၊ အုန်းရွက် စတာ တို့ နဲ့ ပူဇော်လေ့ရှိပြီး မမြင်အပ်တဲ့ နာမ်လောကသား တွေ ကို တားဆီးပါတယ်။ လမ်းနှစ်သွယ်ရဲ့ ကြားထိပ်တည့်တည် ကွင်းပြင်ဘက် ကို မျက်နှာ မူနေရင်တော့ နေဆာလှုံ နေတဲ့ပင့်ကူ (Celedu Nginyah) ဆိုပြီး ရှောင်ပါတယ်။ အကယ်၍ မဖြစ်မနေ ဆောက်ရမယ် ဆိုရင်တော့ ဘုရားကျောင်းဆောင် ကလေးကို ကွင်းပြင်ဘက် မျက်နှာမူပြီး ဆောက်ပါတယ်။ အိမ်သစ် တစ်လုံး နဲ့ မိသားစု အိမ်တစ်လုံးကြား မှာ ဆွေမတော် မျိုးမစပ် ဆောက်ပြီး နေ့လေ့ မရှိပါဘူး။ (Ngapit) လို့ ခေါ်ပြီး ရှောင်ရပါတယ်။ လမ်းရဲ့ ဘေးကွက်လပ် ညာဘက်ဘေးမှာ နဲ့ လမ်းရဲ့ တခြားတစ်ဘက်မှာ ဆွေမျိုးတော် သူရှိရင် လဲ ရှောင်ရပါတယ်။ လမ်းကိုင်တယ် (Negen Jalan) လို့ ခေါ်ပြီး မဆောက်ကြပါဘူး။

၂။ ရပ်ရွာ အရေးကိစ္စတွေအတွက် စည်းဝေးတိုင်ပင်ရာ ခန်းမ (ဓမ္မာရုံ လိုမျိုး) ရဲ့ မြောက်ဘက်နဲ့ အရှေ့ဘက် တည့်တည့် တွေမှာလဲ ဆောက်လေ့မရှိပါဘူး။ အဓိက အရေးပါတဲ့ အချက်က တောင်တွေဘက် ကို ဦးတည် တာဖြစ်ပါတယ်။ အဲဒါကြောင် ဘာလီကျွန်းရဲ့ တောင်ဘက် နဲ့ မြောက်ဘက် မှာ နေတဲ့ သူတွေဟာ ဦးတည်ရာ မတူ ပဲ (တနည်းအားဖြင့်) ဆန့် ကျင်ဘက် တွေဖြစ်နေတတ်ပါသေးတယ်။ ဘာလီကျွန်း မြောက်ပိုင်းမှာနေတဲ့ သူတွေ အတွက် မြောက်အရပ်ဟာ တောင်တန်း တွေကိုညွှန်းဆိုတာ ဖြစ်ပြီး၊ တောင်အရပ်ဟာ ပင်လယ်ကိုညွှန်းဆိုတာ ဖြစ်ပါတယ်။ အဲဒါကြောင့် မြောက်ပိုင်းမှာ နေတဲ့ သူတွေအတွက် မြောက်အရပ်ဟာ (တကယ်တော့) တောင် အရပ်ဖြစ်နေပြီး၊ တောင် အရပ်ဟာ (အမှန်တကယ်အားဖြင့်) မြောက် အရပ်ဖြစ်ပါတယ်။ အသစ်ဆောက်မယ့် အိမ်ရဲ့ မျက်နှာမူ ရာအရပ်နဲ့ ဆက်စပ်မှုကတော့ တောင်တန်း တွေတင် မကပဲ ဘုရားကျောင်း၊ မြစ်ဖျားပိုင်း၊ မြစ်ကမ်းပါး၊ ပင်လယ် ကမ်းခြေ၊ ရေကန်နဘေး ဒါ့အပြင် အထွတ်အမြတ်ထား ရာ မြေနေရာ စတာ တွေကို ထည့်သွင်းတွက်ချက်ရပါသေးတယ်။

ဘာလီ အိမ်တစ်လုံး ၏ သွင်ပြင်လက္ခဏာ
အစဉ်အလာအားဖြင့် အိမ်တစ်လုံး ကို ခြံဝန်းခတ်ထားရပါတယ်။ အိမ်ခြံဝန်း ကို အုတ်စည်းရိုး သို့မဟုတ် ကွန်ကရိ၊ ကျောက်တုံး စသည်ဖြင့် တို့ နဲ့ ခတ်တာ ကို ကာရန် (Karang) လို့ ခေါ်ပြီး၊ ပုဏ္ဏရိတ်၊ ဆူးခြုံ၊ ပန်းပင် စတာတွေနဲ့ သဘာဝအတိုင်းကာရံတာ ကိုတော့ ပန်ရန်းကာ (Penyengkar) လို့ ခေါ်ပါတယ်။ အိမ်တစ်အိမ် အတွက် ခြံစည်းရိုး ဟာ ယတြာ၊မာတြာ စတဲ့ ဟိန္ဒူ အတွေးအခေါ်များ နဲ့ ဆက်စပ်နေလေ့ရှိပြီး အလွန် အရေးပါပါတယ်။ အိမ်တစ်အိမ် ရဲ့ အ၀င်ဝ ဟာ ဂိတ်တံခါး (Angkul-angkul) ဖြစ်ပြီး ရွာလမ်းမ ကိုတိုက်ရိုက် ထွက်ပေါက် ပဲဖြစ်ပါတယ်။ အသေးစိပ် လေ့လာသင့်တာ ကတော့ ဘာလီစုပေါင်းအိမ်ယာ (Balinese Compound House) ပဲဖြစ်ပါတယ်။ အဲဒီ စုပေါင်းအိမ်ယာ ရဲ့ ဖွဲ့စည်းပုံနဲ့ သွင်ပြင်လက္ခဏာ ကလဲ လူတန်းစား (Caste System)အလိုက် ပုဏ္ဏား၊ အုပ်ချုပ်သူ၊ မူးမတ်စစ်သူကြီး၊ ကုန်သည်၊ လယ်သမား တံငါ စသည် အပေါ်မူတည် ပြီးလဲ များစွာ ကွဲပြားပြန်ပါသေးတယ်။

ဘာလီစုပေါင်းအိမ်ယာ

အရိုးရှင်းဆုံး အိမ်တစ်ဆောင် အတွက် အောက်ပါ အစိတ် အပိုင်း များ ပါဝင်ပါတယ်။

၁။ အ၀င်ဝ ဂိတ်တံခါး (Angkul-angkul)
၂။ မီးဖိုဆောင် (Pawon)
၃။ စပါးကျီ၊ စတို (Jineng)
၎။ အိမ်ထောင်ဦးစီး အိမ်ခန်း (Bale Dauh or Bale Loji) အနောက် ဖက်မှာ ဆောက်ပါတယ်။
၅။ ဇရပ်ဆောင် (Bale Dangin) မိသားစုဝင်များ ဘာသာရေးပွဲများကျင်းပရာ၊ ဆုတောင်ပထ္ထနာပြုရာ နေရာ
၆။ အိမ်ထောင် ၏ အသက်အကြီးဆုံး မိသားစုဝင် အိမ်ခန်း (Gedong or Meten) ဒါမှမဟုတ် အဖိုးတန်ပစ္စည်း များ သိမ်းတဲ့နေရာ အဖြစ်သုံးပါတယ်။
၇။ မိသားစု ဘုရားကျောင်းဆောင် (Sanggah or Merajan) အနည်းဆုံး ဘုရားကျောင်းဆောင်ခြောက်ခု ရှိပါတယ်။
၈။ အိမ်ရှေ့ ဘုရားကျောင်းဆောင် (Pengijeng karang) ခြံအပြင်မှာ ဆောက်ရတာ ဖြစ်ပါတယ်။

မိသားစုဘုရားကျောင်းဆောင် (Sanggah or Merajan) ဂါလူဂန်ပွဲတော်နေ့ by AATO

ဇရပ်ဆောင် (Bale Dangin) by AATO

ဘာလီရိုးရာ အိမ်တစ်ဆောင် အကြောင်း ပြောရင် အနည်းဆုံး မိသားစု ဘုရားကျောင်း အကြောင်းထည့် ပြောရမှာပါ။ အိမ်ထောင်စု တစ်ခုအတွက် လွန်လေကြကုန်သော မိဘဘိုးဘွား တွေရဲ့ဝိဥာဏ် တွေကလည်း ကိုးကွယ်ဆည်းကပ်ရာ ဖြစ်ပါတယ်။ နောက်တစ်ချက်က အိမ်ဆောက်ရာမြေနေရာရှိ မြေစောင့်ဘူမိနတ်ကို လည်း အလေးအနက်ထား ပသရပါတယ်။ သို့ပါသော်လည်း ဟိန္ဒူ နတ်ဘုရား များ ကိုပါအဓိကထား ကိုးကွားရာ ဖြစ်တဲ့ အတွက် အိမ်ထောင်စု အသစ် တစ်ခုဆိုရင် အနည်းဆုံး ဘုရားကျောင်းဆောင် ခြောက်ခု ရှိရမှာ ဖြစ်ပါတယ်။ နှစ်ပေါင်းများစွာ နေလာတဲ့ မိသားစုကြီး ဆိုလျှင်တော့ ဘုရားကျောင်းဆောင် ဧရိယာ (Sanggah or Merajan) အတွင်းများ ဘုရားကျောင်းဆောင်တွေ အများကြီး တွေ့ရမှာဖြစ်ပါတယ်။ အဆိုပါ မိသားစု ဘုရားကျောင်းဆောင် များဟာလဲ မတူညီတဲ့ လူတန်းစား အလိုက်ကွဲပြားဦးမှာ ဖြစ်ပါတယ်။ သိုပါသော်လည်း ဒန်ပါဆာ (Denparsa) လို လူဦးရေထူထပ်ပြီး အိမ်ခြေသိပ်သည်း တဲ့ ဘာလီကျွန်းရဲ့ မြို့တော်မှာ တော့ အိမ်တွေမှာ ဘုရားကျောင်းဆောင် နှစ်ခုသာ ထည့်သွင်းဆောက်လုပ်နိုင်ကြပါတယ်။ ခြံအပြည့် အဆောက် အအုံဆောက်လိုက်ရတဲ့ အခြေအနေမျိုးဆိုလျှင် ဘုရားကျောင်းဆောင် ကို အပေါ်ထပ်မှာသာ ဆောက်လုပ်ရတာဖြစ်ပါတယ်။ အထက်ပါဘုရားကျောင်းဆောင် နှစ်ခုကို တော့ ပထမသန နဲ့ တုဂု (Padmasana and Tugu) လို့ ခေါ်ပါတယ်။


ဝန်ခံချက်။ ။ ဘာလီရိုးရာ အိမ်အကြောင်း ကိုရေးရာ မှာ ဆောက်လုပ်ပုံ (ဗိသုကာနည်းပညာဆိုင်ရာများ)၊ အသုံးပြုသည့် ကိရိယာများ၊ ပန္နက်တင် အခန်းအနား၊ ထုတ်၊ယောက်၊ ဒိုင်း၊ မြား၊ ခေါင်၊ အမိုး၊ ဦးစွန်း၊ တံစက်မြိတ်၊ ဆောက်လုပ်စဉ်မှာ ရွတ်ဖတ်သရစ္ဖျယ်ရသည့် ဂါထာ၊ မန္တန်၊ စသည် စသည်တို့ ကို အကြောင်းအမျိုးမျိုး ကြောင့် မပါဝင်နိုင်ပါ။ လိုအပ်၍ အသေးစိပ် သိလိုပါက ဆက်သွယ်နိုင်ပါသည်။


အပိုင်း (၃)* ဘာလီရိုးရာ ကျေးလက်အုပ်ချုပ်ရေးနဲ့လူမှု့အဖွဲ့ အစည်း (Banjar) အကြောင်း ဆက်ရန်


Ref:
- Balinese House by I Made Terima 2002
Original Bibliography

• Ardana, I Gusti Gede : Pengertian Pura di Bali, Universitas Udayana, Denpasar 1979
• Bagus, I Gusti Ngurah : Sistem Pola Menetap Masyarakat Bali, Universitas Udayana, Denpasar Printed by Fakultas Sastra University of Udayana, no date
• I.H.D ( Institute Hindu Dharma ) : Kumpulan Hasil Penelitian Sejarah Pura, Diperbanyak untukkepentingan Intern Mahasiswa Institute Hindu Dharma, Denpasar, no date
• Swellengrebel : Patterns of Cosmic Order, dalam Bali Studies, Life, Thoughts, and Rituals,The Hague - Bandung, 1960
• Soebandi, I Ketut : Pura Kawitan/Padharman dan Penyungsungan Jagat, Indo Press, 1981

- http://www.balibudaya.net/compound.html
- ကိုယ်တိုင် မေးမြန်းသုတေသန ပြုခြင်း မှတ်စု

ဒုတိယပိုင်း ဖျောက်ထားမည့်စာ

ဆက်ဖတ်ကြည့်မယ်...

ပြန်သိမ်းပေးခဲ့မယ်....

ဘာလီ ယဉ်ကျေးမှု့ နှင့် ဓလေ့ထုံးတမ်း အစဉ် အလာများ မိတ်ဆက်

အင်ဒိုနီးရှား နိုင်ငံ ဟာ ကျွန်းပေါင်း ၁၇၅၀၈ ကျွန်း နဲ့ ဖွဲ့စည်း ထားပြီး လူဦးရေ သန်း ၂၀၀ ကျော် မှီတင်းနေထိုင်ပါတယ်။ ကျွန်းတွေ အများကြီး နဲ့ ဖွဲ့ စည်းထားတဲ့ နိုင်ငံဖြစ် သလို ယဉ်ကျေးမှု့ဓလေ့ထုံးစံ တွေလဲ မတူညီကြပါဘူး။ တချိန်က ဗုဒ္ဓဘာသာ ထွန်းကားခဲ့ကြောင်း ကြီးမားထင်ရှားတဲ့ သက်သေ အထောက် အထား များစွာ ကျန်ခဲ့ သလို ဟိန္ဒူဘာသာ ထွန်းကားခဲ့ ကြောင်းလဲ အထောက် အထား မြောက်များစွာ ကျန်ရှိပါတယ်။ လက်ရှိ အချိန်မှာ တော့ အစ္စလာမ် အယူ ၀ါဓ ကို နိုင်ငံ အ၀ှမ်း ကျယ်ကျယ်ပြန့်ပြန့် သက်ဝင်ယုံကြည်ကြပါတယ်။ နိုင်ငံ အနှံ့ ဂျာဗားယဉ်ကျေးမှူု့ ကြီးစိုးပေသော ငြား ကျွန်းအသီးသီး မှာ ၄င်းတို့ ရဲ့ ရိုးရာ ဓလေ့တွေကို တစိုက်မတ်မတ် ထိမ်းသိမ်း ကြပါတယ်။ အထူးသဖြင့် ကမ္ဘာ့ ခရီးသွား မြေပုံပေါ်က နာမည်ကျော် ဘာလီကျွန်း ဟာ ထိပ်ဆုံး ကပါ။ ဘာလီကျွန်း ကို ဥရောပတိုက် သားတွေဟာ အီတလီ နိုင်ငံ ရောမမြို့ တွင်းက ပုပ်ရဟန်းမင်းကြီး အခြေစိုက် ရာ ဗာတီကန်နိုင်ငံ နဲ့ နှိုင်းယှဉ်လေ့ရှိကြပါတယ်။ တကယ်လဲ ဘာလီကျွန်းရဲ့ ယဉ်ကျေးမှု့ နဲ့ ကိုးကွယ်ရာ ဘာသာ ဟာ အင်ဒိုနီးရှားရဲ့ တခြား ကျွန်းတွေနဲ့ မတူပဲ ဟိန္ဒူ အယူဝါဓဖြစ်နေ ပါတယ်။

ဘာလီ မှာနေထိုင် စဉ် ကာလ အတွင်း ဘာလီလူမျိုး တို့ ရဲ့ ယဉ်ကျေးမှု ဓလေ့ထုံးစံ တွေ ကိုသေချာ လေ့လာ မယ်လို့ စဉ်းစားမိပါတယ်။ လူမျိုး တစ်မျိုးရဲ့ အကြောင်း ကိုလေ့လာမယ် ဆိုရင် စနစ်တကျ လေ့လာ မှသာ အလုံးစုံ ပုံပေါ် နိုင်မှာ ဖြစ်ပြီး အသေးစိတ် သုတေသန စာတမ်း ပြုစု ရန်မဟုတ် သိတိုင် အကြောင်းအရာ စုံ ထောင့်စေ့ အောင် အားထုတ်ထားပါတယ်။ လေ့လာတဲ့ နေရာ မှာ မနုဿ ဗေဒပညာရှင် တို့ လူမျိုး တစ်မျိုး အကြောင်းကို ချဉ်းကပ်လေ့ လာတဲ့ ပုံစံ ကို အတုယူပါတယ်။ ဆရာ မနုဿ ကျော်ဝင်း ဟောပြောခဲ့ တဲ့ အချက် တွေ ကို ပြန်စဉ်းစား ပုံဖော်ပါတယ်။ နောက်ပြီး ဖတ်ဖူးခဲ့တဲ့ မြန်မာ့ဆိုရှယ်လစ် လမ်းစဉ်ပါတီ ထုတ် ပြည်ထောင် စု မြန်မာ နိုင်ငံ တော် ရှိ တိုင်းရင်းသား လူမျိုး များ ၏ ဓလေ့ထုံးစံ များ စာအုပ်များ မှ နည်းနာနိသျ ကို အတုခိုးပါတယ်။ ယဉ်ကျေးမှု့ ဓလေ့ထုံးစံ ဆိုတဲ့ အလျောက် ကိုးကွယ်ရာ ဘာသာကိုတော့ ချန်လှပ်ခဲ့မှာ ဖြစ်ပါတယ်။ သို့ပေမင့် ဘာလီ လူမျိုး တို့ရဲ့ ယဉ်ကျေးမှု့ ဓလေ့ထုံးစံ များ အားလုံး ပါဝင်ပြီးပြည့်စုံ တဲ့ စာတမ်း တစ်ခု မဟုတ်ကြောင်း ကိုတော့ ၀န်ခံ ပါရစေ။

ဘာလီကျွန်းသူကျွန်းသား တွေရဲ့ ဘ၀ ကို ဘာသာရေးနဲ့ ဆက်စပ်တဲ့ အခမ်းအနား တွေ ရိုးရာ ဓလေ့တွေနဲ့ အမှတ်အသားပြုပါတယ်။ အဲဒါကို မနုဿ ယတြာ (Manusa Yadnya) လို့ခေါ်ပြီး ငွေကြေး တတ်နိုင်ရင် တတ်နိုင်သလို၊ ဆင်းရဲရင် ဆင်းရဲသလို ကျင်းပဆောင်ရွက်ကြ ပါတယ်။

Photo Taken from here

မွေးဖွားခြင်း

ဘာလီ လူမျိုးတွေရဲ့ ပထမဆုံး အခမ်းအနား ဟာ အမှန်တကယ်တော့ မ မွေးဖွားခင် ကတည်းက ကျင်းပခဲ့ ပြီး ဖြစ်ပါတယ်။ မွေးဖွားပြီး တဲ့အချိန်မှာ ကျင်းပတဲ့ ပွဲက တော့ အချင်းမြုပ်တဲ့ ပွဲပါ။ အချင်းကို အုန်းသီးစိမ်း တစ်လုံး ကို ထိပ်ဝ ဖွင့်ပြီး သက်ဆိုင်ရာ ၀တ္ထုပစ္စည်း များနဲ့ မိမိအိမ်မှာ ပဲမြှုပ်နှံပါတယ်။ နောင် ဒီကလေး ကြီးလာပြီး ကျန်းမာရေး၊ လူမှုရေး အစရှိသဖြင့် ကိစ္စရပ်တွေကို သူ့ အချင်းမြှုပ်နှံရာ နေရာမှာ ဆုတောင်းခြင်း၊ ယတြာ ချေခြင်း များပြုလုပ်ကြပါတယ်။ ဆေးရုံတွေမှာ လဲ ကလေးမီးဖွား ပြီးတာတဲ့ ကလေးနဲ့ အတူ အချင်းကို မြေအိုးလေး တစ်လုံးနဲ့ ထည့်ပြီး ပေးပါတယ်။ အဲဒါကို ဖခင်ဖြစ်သူက အချင်းအိုးကို ယူပြီး အိမ်ကို ပြန်ကာ ရိုးရာ အတိုင်း စီရင် မြှုပ် နှံရပါတယ်။ ကလေးမီးဖွား ပြီး ပထမဆုံး အကြီးအကျယ် လုပ်တဲ့ အခန်းအနား ကို တော့ ဘာလီ ပြက္ခဒိန် ရဲ့ ရက်ပေါင်း ၂၁၀ ပြည့်တဲ့ အချိန်မှာ လုပ်ရတာပါ။

(အကြောင်းဆုံလို့ကျနော့် သမီးလေး မွေးတုန်းက အကြောင်းကို ပြောပြချင်ပါတယ်။ ကျနော့် သမီး လေး မွေးတုန်းက ကလေး လာပို့ရင်းနဲ့ ပလတ်စတစ် အိပ်တလုံးနဲ့ ထည့်ထားတဲ့ မြေအိုးလေး တစ်လုံး ကို ပါပေးလာပါတယ်။ မေးကြည့်တော့ အချင်းလို့ ပြောပါတယ်။ ဒီမှာ က ကိုယ့်ရပ်ရွာလဲ မဟုတ်၊ ဒီလို အရေးတယူ ပေးလာတဲ့ နောက်တော့ အမှိုက်ပစ် သလိုလဲ မပစ်ရက်၊ မပစ်ချင် နဲ့ စိတ်ရှုပ်ပြီး ဆေးရုံကဆင်းလာတဲ့ အခါမှာ အိမ်ကို ယူလာခဲ့ပါတယ်။ နောက်မှ ရုံးက လုပ်ဖော် ကိုင်ဖက် တစ်ယောက် က ပင်လယ်မှာ မျှောဖို့ အကြံပေးလို့ ကျနော့် အိမ်နားက ကမ်းစပ် မှာ ကိုယ်တိုင်ပဲ ရေနက်ပိုင်း အထိကူးပြီး မြှုပ်ခဲ့ပါတယ်။ သမီးလေးကြီးလာရင် တော့ သူ့ အချင်းကို ဘာလီကျွန်း က ဂျင်ဘာရမ် ပင်လယ်အော်ထဲ မှာ မြှုပ်ခဲ့တယ် ပြောရမှာပဲ။)

နာမည် ပေးခြင်း

ထူခြားတာက ဘာလီ လူမျိုးတွေ မှာ ရှေ့နာမည် (first name) ၄ ခုပဲ ရှိပါတယ်။ ပထမဆုံး ကလေးဆို ရင် ဝေယံ (Wayan) ဒါမှမဟုတ် ပုတု (Putu) လို့ ပေးလေ့ရှိပြီး၊ ဒုတိယ ကလေးကို မာဒေး (Made) ဒါမှမဟုတ် ကားဒက် (Kadek) လို့ ပေးပါတယ်။ တတိယ ကလေးကို တော့ ညိုမန် (Nyoman) ဒါမှမဟုတ် ကိုမန်း (Komang) လို့ ပေးရပြီး လေးယောက်မြောက် ကို တော့ ကတွတ် (Ketut) လို့ ပေးကြပါတယ်။ ငါးယောက်မြောက် ကစပြီး မွေးလာတဲ့ ကလေးကို တော့ တစ်ပတ်လည် ပြီး ဝေယံ၊ ပုတု အစရှိသဖြင့် ပြန်မှည့် ရပါတော့တယ်။

ပိုပြီး ရှင်းအောင် အောက်မှာ ဇယား နဲ့ ထပ်ရှင်းထားပါတယ်။

နံပါတ်စဉ်	ကလေးအမည်
ပထမ	ဝေယံ (Wayan) ဒါမှမဟုတ် ပုတု (Putu)
ဒုတိယ	မာဒေး (Made) ဒါမှမဟုတ် ကားဒက် (Kadek)
တတိယ	ညိုမန် (Nyoman) ဒါမှမဟုတ် ကိုမန်း (Komang)
စတုတ္ထ	ကတွတ် (Ketut)
ပဉ္စမ	ဝေယံ (Wayan) ဒါမှမဟုတ် ပုတု (Putu)
ဆဌမ	မာဒေး (Made) ဒါမှမဟုတ် ကားဒက် (Kadek)
သတ္တမ	ညိုမန် (Nyoman) ဒါမှမဟုတ် ကိုမန်း (Komang)
အဌမ	ကတွတ် (Ketut)
န၀မ	ဝေယံ (Wayan) ဒါမှမဟုတ် ပုတု (Putu)
ဒဿမ	မာဒေး (Made) ဒါမှမဟုတ် ကားဒက် (Kadek)
ဧကဒဿမ	ညိုမန် (Nyoman) ဒါမှမဟုတ် ကိုမန်း (Komang)
ဒွါဒဿမ	ကတွတ် (Ketut)

ဘာလီလူမျိုး တွေရဲ့နမူနာ နာမည် တော်တောများများ ဟာ ဗုဒ္ဓ ဘာသာနဲ့ ဆက်စပ် သယောင် ရှိပါတယ်။ ဥပမာ။ ကတွတ် ဓမ္မရာဇာ (Mr. Ketut Dhamayasa) မာဒေး ဓမ္မရံသီ (Ms. Made Dhamayanti) အစရှိသဖြင့်ပေါ့။

ကလေးဘ၀

ဘာလီ လူမျိုးတွေ ဟာ ကလေးချစ် ပြီး ရသလောက် ယူကြပါတယ်။ မိသားစု ကြီးတွေမှာ ကလေး အငယ် ကို ကလေး အကြီး က ထိမ်း စနစ် နဲ့ ပဲ ကြီးပြင်းလာကြပါတယ်။ ကလေးဘ၀ မှာ မွေးနေ့ အခမ်း အနား တွေက လဲ အရေးပါပါတယ်။ အဓိကကျတဲ့ အခမ်းအနား ကတော့ လူပျိုဖော်၊ အပျို ဖော်ဝင်စ မှာ ကျင်းပပြုလုပ်လေ့ရှိတဲ့ သွားပွတ်တိုက် တဲ့ပွဲဖြစ်ပါတယ်။ ဘာလီ ဟိန္ဒူအယူဝါဒ အရ လူတိုင်းမှာ မကောင်းတဲ့ လောဘ၊ ဒေါသ၊ အကျိုးမဲ့ စကားများ ပြောခြင်း၊ ဘ၀င် မြင့်ခြင်း အစရှိသည် တို့ ကို ချိုးနှိမ် စေဖို့ သွားပွတ်တိုက် ခြင်း ပြုလုပ်ရတယ် လို့ ယုံကြည်ကြပါတယ်။ အခန်းအနားမှာ ဟိန္ဒူ ဗြဟ္မ ဆရာ က သွားကို တံစဉ်း နဲ့ပွတ်တိုက် တာဖြစ်ပါတယ်။

သွားပွတ်တိုက်ခြင်း အခမ်းအနား (photo: from here)

ထိမ်းမြားခြင်း မင်္ဂလာ

ဘာလီ က အရွယ်ရောက်တဲ့ သူတိုင်း အိမ်ထောင် ကျတဲ့ အခါမှာ မိသားစု ကြီးတစ်ခု ထူထောင်မယ်ဆိုတဲ့ ရည်ရွယ်ချက် မျိုး ရှိကြပါတယ်။ အနည်းဆုံး တော့ ကလေး ၃ ယောက် ယူမယ် ဆိုတဲ့ ငယ်ရွယ်သူ စုံတွဲ များစွာ တွေ့ ဘူးပါတယ်။ တခြား အာရှ နိုင်ငံများလို ပဲ အခြေခံ အားဖြင့် လက်ထပ်တဲ့ နည်းလမ်း နှစ်မျိုးရှိပါတယ်။ မပ္ပဒဒ် (Mapadik) ခေါ်ဆိုတဲ့ လက်ထပ်နည်း မှာ ကြင်သူ နှစ်ဦး မေတ္တာမျှ၍ လက်ထပ် ရန် ဆုံးဖြတ် ကာ သတို့ သား ဖြစ်သူ ဟာ မိဘတွေကို ခေါ်ပြီး တောင်းရမ်း လက်ထပ်ယူတဲ့ နည်းဖြစ်ပါတယ်။ နောက် တနည်း ကတော့ ငိုရောဂ် (Ngorod) လို့နာမည် ရပြီး အတိုချုပ်ရ ရင် ခိုးပြေးတဲ့ နည်းပဲဖြစ်ပါတယ်။ လူတန်းစား မတူ တဲ့ သတို့ သား နဲ့ သတို့ သမီး လောင်းတို့ ဟာ နှစ်ဘက် မိဘ သဘောမတူ မှာ သေချာ လို့ ခိုးပြေး ကြတာပဲ ဖြစ်ပါတယ်။

Photo Taken from here

မတူသောလူတန်းစား များ (Caste System in Bali)

ဘာလီကျွန်းဟာ အန္ဒိယ နိုင်ငံ မှ မိုင်ပေါင်း ထောင်ချီ ဝေကွာ ပေမယ့် ဟိန္ဒူ အယူဝါဒ နှင့် အတူ လူတန်းစား ခွဲ တဲ့ အလေ့အထ ပါ ထွန်းကား ကျင့်သုံးပါတယ်။ သို့ပေမယ့် အိန္ဒိယ မှာကဲ့သို့ အလွန် အမင်း အယူသည်း ကာ ကျဉ်းမြောင်း သော အတွေး အခေါ် မရှိကြပဲ ရိုးရာ အဖြစ်သာ ထိမ်း သိမ်းကြ တာဖြစ်ပါတယ်။ ဘာလီမှာ ရှိတဲ့ မတူတဲ့ လူတန်းစား များ ကို အိန္ဒိယ အခေါ်အဝေါ် (ဟင်ဒီ သို့ မဟုတ် သင်္သက္ကရိုက် ဘာသာ) များ နဲ့ အစဉ်လိုက် ယှဉ်တွဲ ဖော် ပြထားပါတယ်။

ဘာဟာဆာအင်ဒိုနီးရှား	သင်္သသက္ကရိုက်။ သက္ကတ	ဟင်ဒီ	မြန်မာ
Brahmana	ဗြဟ္မဏ	Brahmin	ဗြဟ္မဏ၊ ပုဏ္ဏား
Ksatriya	ခတ္တိယ	Kshatriyas	မင်းမျိုးမင်းနွယ်
Wesya / Wesia	၀စ္ဆယ* ၊ ၀ဿ**	Vaishyas	မူးမတ် မျိုးနွယ်။ စစ်သူကြီး မျိုးနွယ်
Sudra	သုဒ္ဒြ*၊ သုဒ္ဒ**	Shudras	လယ်သမား၊ အလုပ်သမား၊ တံငါ၊

(*) အမှတ်အသားပြုထား သည်မှာ မသေချာပါ။ အတိအကျ သိသူများ ပြင်ဆင်ပေးဖို့ မေတ္တာရပ်ခံပါတယ်။

(**) ဘုန်းဘုန်း တောက်ပကြယ်စင် မျှဝေ တဲ့ အတိုင်းထပ်မံ ဖြည့်စွက်ထားပါတယ်။ ကျေးဇူးတင်ပါတယ် ဘုရား။

ဆက်ရန်...


ကျမ်းကိုးစာရင်း
- ၀ီကီပိဒိယ စွယ်စုံကျမ်း
- Balinese Traditional Arhcitecture in Process by Jakuya Kagami
- Bali Museum
- ကိုယ်တိုင် သုတေသနပြု မေးမြန်းချက်များ မှတ်စု

ဒုတိယပိုင်း ဖျောက်ထားမည့်စာ

ဒုတိယပိုင်း ဖျောက်ထားမည့်စာ

ဆက်ဖတ်ကြည့်မယ်...

ပြန်သိမ်းပေးခဲ့မယ်....

မြေပုံပေါ်က မျဉ်းကြောင်းကလေး

မလေးရှားနဲ့ အင်ဒိုနီးရှားကျွန်းစု အတွင်းက ဇီဝမျိုးစုံမျိုးကွဲတွေ အကြောင်းပဲ ဖြစ်ဖြစ်၊ ရုက္ခဗေဒဆိုင်ရာ ပဲဖြစ်ဖြစ်၊ ဆင့်ကဲဖြစ်စဉ် ဆိုင်ရာ သီဝရီ တွေပါတဲ့ ဘယ်စာအုပ် ကို မဆို ကောက်ကိုင်လိုက်ရင် အဲလ်ဖရက်ရပ်ဆဲလ်ဝေါလေ့စ် (Alfred Russel Wallace) နဲ့ သူ့ရဲ့ "မျဉ်းကြောင်းကလေး" ကိုသွားသွားရည် ညွှန်းတတ်တာ တွေ့ရတယ်။

ကျနော်တို့ အားလုံး ချားလ်ဒါဝင် (Charles Darwin) နဲ့ သူ့ရဲ့ "သက်ရှိအစ" (Origin of Species) ဆိုတဲ့ စာအုပ်ထဲ က "သက်ရှိနှင့် အပင်တို့ ၏တရွေ့ရွေ့ပြောင်းလဲမှုဖြစ်စဉ်" သီဝရီ ကို ဖတ်ဖူး ကြားဖူးကြတယ်။ ဒါပေမယ့် အဲဒီသီဝရီ ကိုပူးတွဲ ဖော်ထုတ်ခဲ့တဲ့ အဲလ်ဖရက်ရပ်ဆဲလ်ဝေါလေ့စ် ကိုတော့ သဘာဝပါတ်ဝန်းကျင် လေ့လာရေးသမားစစ်စစ် အနည်းအကျဉ်း လောက်ကလွဲလို့ သိပ်သိ ကြမယ်မထင်ဘူး။ သူ့ရဲ့ အထူး စိတ်ဝင်စားရာ နယ်ပယ်က ကမ္ဘာ့ အပင်နှင့် သက်ရှိ တို့၏ ဖြန့်ကြက် ပျံ့နှံ့ ပုံ ကိုသုတေသနလုပ်ခြင်းပဲ။ သူ့ရဲ့ သီဝရီ တွေအတွက် အဓိကကျတဲ့ တွေ့ရှိချက်တွေ ကို အင်ဒိုနီးရှားကျွန်းစု တွေမှာ လုပ်ရင်းတွေ့လာရတာဖြစ်ပါတယ်။ အတိအကျ ဆိုရရင် ဘာလီ (Bali) နဲ့ လွန်ဘွတ် (Lombok) ကျွန်း နှစ်ကျွန်းမှာ လုပ်ခဲ့တာပါ။

အဲလ်ဖရက်ရပ်ဆယ်လ်ဝေါလေ့စ် (၁၈၂၃ - ၁၉၁၃)

ဝေါလေ့ဟာ ကမ္ဘာကြီးကို ပထ၀ီသွင်ပြင်လက္ခဏာ နဲ့ ရာသီဥတု အပေါ်လိုက်ပြီး အပိုင်း ခြောက်ပိုင်းခွဲ ပြီး မြင်တယ်။ အဲဒီ ကွဲပြားတဲ့ ပထ၀ီသွင်ပြင်လက္ခဏာ တွေနဲ့ ရာသီဥတု တွေကြောင့်ပဲ မတူတဲ့ တိရိစ္ဆာန် နဲ့ အပင် ဇီဝအုပ်စု တွေ ဖြစ်ပေါ်စေတာပါပဲ။ သြစတေးလျား နဲ့ အရှေ့တောင်အာရှ ဆက်စပ်နေတဲ့ နေရာတွေ မှာ သူရဲ့ အမြင်ကို ပိုထင်ရှားပေါ်လွင်စေတဲ့ သာဓကတွေ တွေ့လာရတယ်။

အဲဒီမှာ သူ့ရဲ့ နာမည်ကျော် မျဉ်းကြောင်းကလေး ကလေးကိုဆွဲတော့ တာပဲ။ ယနေ့ခေတ်မှာ "ဝေါလေ့စ်ရဲ့မျဉ်းကြောင်းကလေး (Wallace's Line)" လို့ထင်ရှားလာမယ့် မျဉ်းကြောင်းကလေး ဟာ ဖိလစ်ပိုင်ကျွန်းစု ရဲ့အရှေ့တောင်ဘက်ပိုင်း ကနေပြီးတော့ စဆွဲလာလိုက်တာ အင်ဒိုနီးရှား မင်ဒါနောင် (Mindanau) နဲ့ ဆန်ဂီဟေ (Sangihe) ကျွန်းနှစ်ကျွန်းကြား ကနေဖြတ်ပြီးတော့ တောင်ဘက် ကလီမင်တန် (Kalimantan - ဘော်နီယိုကျွန်း လို့လူသိများ) နဲ့ဆူလာဝဆီ (Sulawasi) ကျွန်း နှစ်ကျွန်း ကြားကနေ ဘာလီ နဲ့ လွန်ဘွတ် ကိုဖြာထွက် ပြီး အိန္ဒိယသမုဒ္ဒရာ အတွင်းကို ဆွဲထွက်သွားပါတယ်။

ဝေါလေ့စ်ရဲ့ မျဉ်းကြောင်းကလေး ဟာ အရှေ့တောင်အာရှ အီကွေတာ ရပ်ဝန်း အပူပိုင်း ဇုံ က စတင်ပြီး သြစတေးလျဘက် ကို ကုန်းမြေ၊ အပင်တွေ နဲ့ဇီဝသားငှက် တိရိစ္ဆာန် တွေ ဆက်စပ်ပြောင်း လဲတဲ့ နေရာနဲ့ တရွေ့ရွေ့ဆင့်ကဲပြောင်းလဲလာတဲ့ နေရာဒေသ တွေရဲ့ဗဟိုချက်မ တွေကို အမှတ်အသား ပြုပါတယ်။

ဝေါလေ့စ် ဟာသူ့ရဲ့အလွန် အရေးပါတဲ့ စာအုပ်ဖြစ်တဲ့ (Malay Archipelagos, Land of Orang Utan and the Paradise of Birds, A Narrative of Travel with Studies of Man and Nature: 1868, Macmillan and Co., London) မှာ ဘယ်လိုရေးထားလဲ ဆိုတော့ "အင်ဒိုနီးရှားကျွန်းစု ရဲ့ အပိုင်း နှစ်ပိုင်း ယှဉ်ကြည့်လိုက် တဲ့အခါမှာ အင်မတန်ကွာခြားတဲ့ အချက်က ရုတ်ခြည်း သိသိသာသာ ပြောင်းလဲသွားတဲ့ အခြေအနေ တွေကို ပထ၀ီဝင် အရ အင်မတန် နီးကပ်တဲ့ ဘာလီနဲ့ လွန်ဘွတ်ကျွန်း တွေမှာထင်ထင်ရှားရှားတွေ့နိုင်တယ်"။ ဘာလီမှာ ဆိုရင် ဂါဘယ် (Garble)၊ မြေလူးငှက် (Fruit Thrush) နဲ့ သစ်တောက်ငှက် (Woodpecker) တို့ကိုတွေ့ နိုင်ပေမယ့် လွန်ဘွတ်ကျွန်း မှာ မတွေ့နိုင်တော့ပါဘူး။ ဒါပေမယ့် လွန်ဘွတ်မှာ ပေါခြင်းသောခြင်း တွေ့နိုင်တဲ့ ကတ္တ၀ါ (Cockatoo )၊ ပျားရည်စုပ်ငှက် (Honeysucker) နဲ့ အမြီးပွကြက်ဆင် (Brush-turkey) တို့ကို ဘာလီနဲ့ အနောက်ပိုင်းကျွန်းများ တလျောက်မှာ မတွေ့ရပါဘူး။ ရေလက်ကြားဟာ ဆယ့်ငါးမိုင်ဘဲကွား ခြားပြီး နှစ်နာရီခရီး မျှသာရှိပါတယ် ဒါပေမယ့် ကမ္ဘာကြီးရဲ့ အပိုင်းနှစ်ပိုင်း ဟာ ဥရောပနဲ့ အမေရိက လိုကွာခြားသွားပါပြီ။

အဲဒီမျဉ်းကလေးရဲ့ တဖက် နဲ့ တခြားတဖက်တို့ဟာ လုံးဝဥသုံ ကွားခြားပါတယ်။ ဒါဟာတကယ့် အမှန်တရားပဲ ဖြစ်ပါတယ်။ ပြောရမယ်ဆိုရင် ဘာလီနဲ့ လွန်ဘွတ် ဟာ ကီလိုမီတာ နှစ်ဆယ် မဲ့မဲ့မျှသာ ရှိပေမယ့် တစ်ကျွန်း နဲ့ တကျွန်း သားငှက်တိရိစ္ဆာန်တွေ ဘယ်တုန်းကမှ ကူးလူးသွားလာ ဖို့မတတ်စွမ်းခဲ့ကြပါဘူး။ ဝေါ့လေ့စ် ရှင်းပြထားတာက ဘာလီနဲ့ ဂျာဗားကျွန်းမကြီး ကြားက ရေလက်ကြားဟာ မီတာ နှစ်ရာ အနက်သာရှိပေမယ့်၊ ဘာလီ နဲ့ လွန်ဘွတ်ကြားက ရေလက်ကြားကတော့ မီတာနှစ်ရာ ကနေ မီတာသုံးထောင် အထိ ရှိလို့ပါတဲ့။

အနီးဆုံး ရေခဲခေတ်ကာလက ရေထုဟာ ရေခဲပြင်အောက်မှာ ပိတ်မိနေပြီး ပင်လယ်ရေမျက်နှာပြင် ဟာ ယခုအခြေအနေထက် မီတာတစ်ရာ့ရှစ်ဆယ်မျှနိမ့်ကျ နေခဲ့ပါတယ်။ နိမ့်ကျနေတဲ့ ပင်လယ် ရေမျက်နှာပြင်ကြောင့် မလေးရှား၊ စုမတြား၊ ဂျာဗား နဲ့ ဘာလီ ဟာခြောက်သွေတဲ့ ကုန်းမြေတဆက်တည်း အဖြစ် ရှိနေခဲ့ပါတယ်။ သို့ပေမင့် သြစတေးလျား၊ နယူးဂိနိ နဲ့ နီးစပ်ရာ လွန်ဘွတ် အပါအ၀င်ကျွန်းတွေ ကျတော့ ကုန်းမြေမကြီး အဖြစ် တဆက်တစပ်တည်းဖြစ် နေခဲ့ပါတယ်။ ဘာလီ နဲ့ လွန်ဘွတ်ကြားက နက်ရှိုင်းတဲ့ ရေမြောင်း ကြီးဟာ အဓိကအပိုင်းအခြား အဖြစ် ဖြစ်တည်ခဲ့တာပါ။ အဲဒီရေမြောင်းကြီးဟာ နက်ရှိုင်းရုံသာမကပဲ အင်မတန်လဲ ရေစီးသန်လှပါတယ်။ ဒုတိယကမ္ဘာစစ် အတွင်းက သြစတေးလျ က နေ စင်္ကာပူကို ချီတက် ခုတ်မောင်း လာတဲ့ ရေငုတ်သင်္ဘော ကြီးဟာ ရေစီးကြောင်း အတွင်း မှာ ၁၀ နာရီလောက် တစက်ကလေး မှ မရွေ့ လို့ တိုက်ပွဲ ပုံစံ အသည်းအသန် ထိုးဖောက်ထွက်ခဲ့ရတာ ရှိပါတယ်။

အဲဒီနေရာက စပြီး ပထမဆုံးတွေ့ရမယ့် ပေါ်လီနီးရှန်း ကျွန်းတွေ နဲ့ ကီလိုမီတာ ထောင်ချီပြီး အရှေ့ယွန်းယွန်း ကို ဆက်သွားမယ်ဆိုရင် တောတောင်သစ်ပင်တွေဟာ မိုးသစ်တော တွေလိုမဟုတ်တော့ပဲ ညို မောင်းမောင်း အရောင်တွေ အဖြစ် တွေ့လာရပါမယ်။ ခြုံပုတ် တခုကနေ တခုကို ခုံကျော်ထွက်လာတတတ်တဲ့ သားပိုက်ကောင်တွေ ကို တွေ့ချင်မှ တွေ့ရမှာ ဖြစ်ပေမယ့် ဟိုဘက်အခြမ်းမှာ လုံးဝမရှိတဲ့ သက်ရှိသတ္တ၀ါ အသစ်တွေ ဖြစ်တဲ့ တောဘဲရိုင်းတွေ၊ တောဝက်ကြီးတွေ၊ ပုရွက်ဆိတ်စား ကောင်တွေ၊ အ၀ါရောင်အမောက်နဲ့ ကတ္တ၀ါငှက်တွေ၊ ချဉ်ပေါင်ဖူးရောင် ကြက်တော တွေ နဲ့ ကိုမိုဒိုကျွန်း (Komodo) မှာဆိုရင် တော့ အင်မတန်ကြီးမားတဲ့ ဖွတ်နဂါး ကြီးတွေ ကိုပါတွေ့လာရမှာ ဖြစ်ပါတယ်။


တကယ်တော့ ဝေါလေ့စ်ရဲ့ မျဉ်းကြောင်းကလေးဟာ ကမ္ဘာ့မြေပုံပေါ်မှာ နှစ်ပေါင်းများစွာ မထင်မရှားဖြစ်နေတဲ့ လွန်ဘွတ်ကျွန်း ကို ကမ္ဘာလောက ကြီးရှိ သက်ရှိ တွေနဲ့ အပင် တို့ရဲ့ ဆင့်ကဲဖြစ်စဉ် သီဝရီ တွေ ကိုအခြေပြု ပြီး ထာဝရဆက်သွယ် ပေါင်းကူး ပေးတဲ့ နေရာတခု အဖြစ် အမြဲလေ့လာ ရမည့် နေရာ သဘောမျိုး သတ်မှတ်ပေးလိုက် သလိုပင်။

Ref:
- Wikipidia
- Britannica Online Encyclopedia
- Where World's Collide, Wallace Line by Penny van Oosterzee (Corne Cornell University Press)


Photo:
- http://www.fredlangfordedwards.com/ar_wallace/ar_wallace_malay_archipelago.htm
- http://www.libraries.uc.edu/libraries/arb/exhibits/darwin/wallace_visit.html
- http://justwallpaperdownload.blogspot.com/2011/04/malaysia-rainforest.html
- http://animals.howstuffworks.com/animal-facts/komodo-bite.htm

ဆက်ဖတ်ကြည့်မယ်...

ပြန်သိမ်းပေးခဲ့မယ်....